Қашқадарё вилоятининг Қарши шаҳридаги «стоянка»да ҳайдовчининг тоби қочиб, воқеа гувоҳлари ЙПХ инспекторларини айблаган видео тарқалди. Бу ҳақда «Дарё»га хабар берган муштарийнинг айтишича, воқеа 2021 йилнинг 8 июль куни туш пайтида содир бўлган.
«Тоби қочган ҳайдовчи чироқчилик экан. Ноқонуний таксилар фаолиятига қарши ‘рейд’ тадбирлари ўтказилаётган бўлган. Бугун шундай тадбирларнинг тўртинчи кунида шундай воқеа содир бўлган», — дейди «Дарё» мухбири билан суҳбатлашган хабарчи.Мазкур воқеага изоҳ берган вилоят Йўл ҳаракати хавфсизлиги бошқармаси ахборот хизмати раҳбари Жавлон Бахтиев воқеага прокуратура ходимлари эътибор қаратганини айтди.
«Бу ҳақда прокуратурага шикоят тушган. Шу боис, прокуратура ходимлари бизга ҳам чиқишди ва маълумот сўрашди. Биласиз, ходимлар билан боғлиқ ҳар қандай ҳолат прокуратура ходимлари томонидан кўриб чиқилади. Воқеанинг аниқ тафсилотлари ҳақида менда ҳозирча аниқ маълумотлар йўқ. Бироқ тез орада аниқлаштирамиз», — дейди вилоят ЙҲХБ ахборот хизмати раҳбари Жавлон Бахтиев.
Жавлон Бахтиевнинг аниқлаштиришича, воқеа 2021 йил 8 июль эмас, 7 июлда содир бўлган.
«Менимча, ҳайдовчи ИИБ ходимларининг талабига бўйсунмаган, сўнгра ИИБ ходимлари ҳайдовчига куч ишлатган бўлиши мумкин. Мен воқеа жойига борганимда ҳайдовчининг тоби қочиб қолган экан. Ўша ердагилар унинг тили тортилиб кетаётганини, вазият жиддий эканлигини айтиб, шифохонага олиб кетди. Воқеанинг кейинги тафсилотларидан хабарим йўқ», — дейди исми сир қолишини сўраган воқеа гувоҳларидан бири.
Вилоят Транспорт бошқармаси ахборот хизмати раҳбари Мирзоҳид Жўраевнинг «Дарё»га маълумот беришича, нафақат Қарши шаҳрида, вилоят миқёсида ноқонуний фаолият юритаётган таксилар фаолиятига қарши «рейд» тадбирлари бўлиб ўтмоқда.
«Дарё» воқеалар ривожини кузатишда давом этади.
Изоҳ (0)