Илон Маск томонидан 11 июнь куни тақдим этилган янги Tesla Model S Plaid ҳаракат вақтида ёниб кетди. Машина эгаси бахтли тасодиф туфайли омон қолган — ёнғин сабаб машина электроникаси ишдан чиққан ва эшиклар ёпилиб қолган. Эркак салондан чиқиш учун эшикни бузишга мажбур бўлган, шу билан бирга, электрокар ҳаракатланишни давом эттираверган, деб хабар беради Motor.
Энг кучли Tesla электрокари 11 июнь куни компаниянинг Фримонтдаги корхонасида бўлиб ўтган Delivery Дай маросимида тақдим этилган эди. Илон Маск автомобиль учталик мотордан ташқари, янги терморегуляция тизимига эга бўлганини ва у оддий Model S’га хос бўлган қизиб кетишларга бардошли эканини маълум қилганди.
Нуқсонли электрокар эгаси Tesla бош директорининг сўзларига қўшилмайди ва компанияни кўнгилсиз ҳодиса бўйича жиддий текширув ўтказишга чақирган. АҚШ Йўл ҳаракати хавфсизлиги миллий администрацияси ушбу позицияни қўллаб-қувватлаган. Идора вакилларининг таъкидлашича, ҳозирда улар ўз текширувларини олиб бормоқда, ишлаб чиқаришда оммавий нуқсон аниқланса, тегишли чоралар кўрилади.
Аввалроқ Tesla Model S Plaid’нинг ғайриоддий рули шаҳар шароитида бошқаришда жуда ноқулай бўлиб чиққани тўғрисида хабар берилганди.
Мавзуга доир: Tesla компанияси ўзининг энг қиммат машинаси Model S Plaid Plus’ни ишлаб чиқаришни тўхтатди
Изоҳ (0)