Навоий вилояти Қизилтепа тумани ҳудудидан ўтган йўлда Nexia-2 ЙТҲга учраши оқибатида 20 ёшли йўловчи вафот этди. Бу ҳақда Навоий вилояти ИИБ ЙҲХБ матбуот хизмати хабар берди.

Воқеа 27 июнь куни соат 12:30 ларда юз берган. 20 ёшли ҳайдовчи Nexia-2’ни Қизилтепа—Когон йўналишида катта тезликда ҳайдаб кетаётганида бошқарувни йўқотиб, ағдарилиб кетган.

Оқибатда автомобилда йўловчи сифатида кетаётган 20 ёшли фуқаро оғир тан жароҳатлари олиб, туман тиббиёт бирлашмасида кўрсатилган муолажаларга қарамай вафот этган.

Ҳолат юзасидан Қизилтепа ИИБ тергов бўлими томонидан ҳайдовчига нисбатан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш оқибатида одамлар ўлимига олиб келиш) билан жиноят иши қўзғатилган.

Айни пайтда тергов ҳаракатлари олиб борилмоқда.

Аввалроқ Навоийда ҳайдовчининг тезликни ошириши оқибатда уч нафар йўловчи вафот этгани, Навоий вилояти Қизилтепа туманида юк автомобили билан тўқнашган велосипедчи шифохонада вафот этгани ҳақида хабар берилган эди.