Табиатнинг нақадар сир ва синоатларга бой эканининг исботи бўлган ҳодисалар ҳақида маълумот бериб ўтамиз.
Намибиядаги айланалар
Намибиядаги саҳро кенгликларида келиб чиқиши экологларнинг баҳсига сабаб бўлган, диаметри 15 метргача бўлган айланалар бор. Айримлар бунга уяси жойлашган ердаги ўсимликларни жойидан тозалайдиган термитлар (чумолисимон ҳашарот) сабабчи деб билади.
Бошқа бир тахминларда эса шу йўл билан ўсимликлар сувга эришиш учун рақобатлашишини билдиради. Маҳаллий аҳоли бўлса, ер тагида аждарҳо яшаши ва унинг нафаси ташқарига айнан шу йўл билан чиқишига ишонади. Олимлар ҳар иккала гипотеза — термит ва сув билан боғлиқ қарашлар ҳақиқат бўлиши мумкин деган қарорга келган.
Танзаниядаги Натрон кўли
Натрон кўли соҳили бир қарашда кишини қўрқувга солса, ранг-баранглиги билан кишини ўзига мафтун қилади. Кўлдаги туз ва ишқор концентрацияси шунчалик юқорилигидан сувга тасодифан тушган исталган тирик жон мумиёга айланади. Ягона истисно галофил сианобактериялари ҳисобланади. Айнан улар сабаб кўлдаги сув ранги пуштидан алвон рангигача ўзгариши мумкин.
Иккинчи истисно митти фламинголар ҳисобланади. Сувнинг юқори ҳарорати (50 даража) сабаб фламинголар йилнинг исталган фаслида тухум қўйиши мумкин. Ёқимсиз ҳид уларга умуман ҳалал бермайди, қайтанга ёввойи қушларни чўчитади. Февраль ва март ойларида кўлдаги карбонат натрийнинг концентрацияси ҳар доимгидан ҳам юқори бўлади.
Рақс тушгандек гала бўлиб ҳаракатланадиган чуғурчуқлар
Кўкда рақс тушган сингари парвоз этаётган чуғурчуқларга назар ташлаб, уларнинг бир гала асалари эмас, қуш эканига ишониш қийин. Кишини ҳайратга соладиган ушбу ўзига хосликнинг сабабини олимлар ҳалигача билишга муваффақ бўлмаган. Тахминлардан бирида бу қушларнинг ёввойилардан ҳимоя реакцияси экани айтилса, бошқасида чуғурчуқлар қатъий алгоритм асосида ҳаракатланиши, бундай парвоз вақтида бир-бирини ҳис қилиб, максимал даражада хабардор бўлиб туриши таъкидланади.
Ҳаракатланувчи тошлар
АҚШдаги Ўликлар водийсида жойлашган, Рейстрек-Плайя қуриган кўл ўрнидаги тошлар дақиқасига 2-2,5 метрга ўз-ўзидан ҳаракатланади ҳамда сезиларли из қолдирмайди. ХХ асргача буни илоҳий ҳодиса деб ҳисоблаган олимлар кейинчалик бунга магнит майдони сабаб деб ўйлаган, 2014 йилда эса аниқ хулосага келган. Бунинг учун тадқиқотчилар датчик ва фотокамера ўрнатилган 5-15 кило оғирликдаги тошларни мазкур ҳудудга қўйиб кузатган. Тадқиқот натижасига кўра, тошларнинг бундай ҳаракатланишига ингичка (бир неча миллиметр), аммо узун музлар сабабчи экани, тошлар шу муз бўйлаб ҳаракатланиши аниқланган.
Taos шовқини
Taos hum деб аталадиган шовқин энг ажойиб табиий ҳодисалар рейтингида биринчи ўринни эгаллайди. АҚШнинг жануби-ғарбий қисмида жойлашган Taoс шаҳри аҳолиси кўп йиллардан буён саҳродан тараладиган паст частотали шовқинни эшитади. Оғир техника ҳаракатланишининг овозига ўхшаган шовқин маҳаллий аҳолидан фарқли ўлароқ саёҳатчиларга камдан кам ҳолларда эшитилади. Шовқиннинг аниқ сабабини топа олмаган олимлар унинг пайдо бўлишига қишлоқ яқинидан ўтадиган электр узатиш линиялари сабаб бўлиши мумкинлигини тахмин қилган.
Ҳессдален алангаси
Табиатга номаълум бўлган оқ аланга илк бор 1981 йил Норвегиянинг Ҳессдален шаҳри яқинидаги водийда пайқалган. Мунтазам равишда пайдо бўлган ушбу ажойиб ҳодиса 1984 йил бир ой ичида олимлар томонидан 53 марта қайд этилган. 1988 йилда водийдан узоқ бўлмаган ерга автомат кузатув станцияси ўрнатилган.
Шарли чақмоқ
Шарли чақмоқ физик исботи бўлмаган, аммо пайдо бўлиши билан боғлиқ фаразлар бисёр бўлган кам учрайдиган табиат ҳодисаси саналади. Айрим олимлар шарли чақмоқ умуман мавжудмаслиги, бу галюцинация эканини таъкидлайди. Гўё булутлар булутлардан тушаётгандек кўринадиган чақмоқ вақти унинг ёнида бўлиш хавфли саналади.
Изоҳ (0)