Қуёшдан ҳимояловчи кўзойнакларни қандай танлаш кераклиги юлдузлар мисолида

Қуёшдан ҳимоя қилувчи кўзойнаклар гардишининг ҳам энг кенг тарқалган турлари мавжуд: «авиаторлар», «леннонлар», «вайфарерлар», «ниначи», «мушук кўзи», «панто», «клабмастер», «тулкичалар».

Юқоридаги кўзойнакларнинг қисқача хусусиятларни кўриб чиқамиз:

•  «Авиаторлар» — бу кўпчиликка маълум бўлган ҳарбий кўзойнак модели. Улар кўз ёшлари шаклидаги линзалардан иборат.
• «Леннонлар» — ингичка металл рамкага эга юмалоқ линзалар.
• «Вайфарерлар» — бу классик авиаторларнинг ажойиб версияси. Одри Хепбёрннинг «Тиффанидаги нонушта» фильми қаҳрамонида бундай кўзойнакларни кўриш мумкин.
• «Ниначи» — бу қавариқ линзаларга эга катта рамкали кўзойнак тури. Бундай кўзойнаклар Жаклин Кеннедининг севимли аксессуари бўлган.
• «Мушук кўзи» — энг нозик ва замонавий шакл деб ҳисобланади, унинг асосий хусусияти учли, ва шу билан бирга, чўзилган ташқи бурчакларидир.
• «Панто» — жуда машҳур классик шакл бўлиб, кўпинча ўткир ташқи бурчаклари билан ажралиб туради.
• «Тулкичалар» – ингичка йўл бўйлаб чўзилган линзалари бор ажойиб модель.

Бундан ташқари, бугунги кунда тўғри тўртбурчаклар ва овал шаклидаги гардишли кўзойнаклар ҳам жуда машҳур.

Ҳар бир инсоннинг юзи мутлақо ўзига хосдир, юзлар овал, думалоқ, квадрат, тўртбурчак ва учбурчак шаклда бўлиши мумкин. Кўзойнак танлашда муҳим бир қоидани унутманг: юз шакли қанчалик кичик бўлса, кўзойнак гардиши дизайни нозикроқ бўлиши керак. Келинг, буни юлдузлар мисолида батафсил кўриб чиқамиз.

Риз Уизерспуннинг юрак шаклидаги юзи «вайфарерлар», «панто» ёки «авиаторлар» каби гардишли кўзойнаклар билан мукаммал уйғунлиги аниқ. Қуёшдан ҳимояловчи кўзойнакларни танлаётганда бундай юзли қизлар ўткир бурчакли ёки катта гардишлардан қочиши керак, чунки бу бошнинг юқори қисмини визуал равишда кенг қилиб кўрсатади.

Овал шаклидаги юз эгаларининг омади келган, чунки уларга деярли ҳар қандай турдаги кўзойнаклар мос келади. Буни Ирина Шейк мисолида аниқ кўриш мумкин. Юлдуз барча кўзойнаклардан фойдаланади: ултразамонавий «тулкичалар»дан тортиб классик «вайфарерлар»гача. Ҳатто мураккаб тўртбурчак гардишлар ҳам унга ярашади.

Селена Гомес сингари думалоқ юз эгаларига бурчакли, тўртбурчак ва трапецияли кўзойнаклар жуда мос келади. «Авиаторлар» ва «вайферерлар» каби классик моделлар билан бирга, нозик аёлларга хос «мушук кўзи» ҳам ёддан чиқмаслиги керак.

Соҳибжамол Оливия Уайлд эса юзнинг мураккаб, яъни квадрат эканлигини ҳисобга олишни яхши билади. Шунинг учун у «авиаторлар» ёки «леннонлар» каби томчи ва юмалоқ гардишларни танлайди. Муҳими, қуёшдан сақлайдиган кўзойнаклар ҳажми юзнинг кенглигидан катта бўлмаслиги керак.

Хлоя Мореснинг тескари учбурчак юзи бор. Бундай кўринишга эга бўлган қизлар тор иякни кенг пешона билан уйғунлаштирадиган гардишларга эътибор беришлари керак. Бунинг учун бурчакли ва «панто» каби классик моделлар жуда мос тушади. Аммо катта тўртбурчак ва ингичка гардишлардан фойдаланмаган маъқул.