Сўнгги 5 йилда Ўзбекистонда олий таълимга қабул квотаси 3 баробар оширилиб, 2021 йилда 182 минг нафар ёш учун талаба бўлиш имконияти яратилди. Бу ҳақда 30 июнь куни Ботаника боғида ўтказилган Ўзбекистон ёшлари ва талабалари форумида Президент Шавкат Мирзиёев сўз юритди, дея хабар бермоқда «Дарё» мухбири.
«Мамлакатимизда юқори билим ва малакага эга бўлган, рақобатбардош кадрлар тайёрлаш мақсадида олийгоҳлар сони 127 тага етказилди, 26 та хорижий олий таълим муассасасининг филиаллари очилди. Шунингдек, кейинги 5 йилда олий таълимга қабул квотаси 3 баробар оширилиб, жорий йилда 182 минг нафар ёш учун талаба бўлиш имконияти яратилди. Бу умумий қамров 28 фоизга етди деганидир. Ваҳоланки, 4 йил аввал бу рақам атиги 9 фоизни ташкил этарди.
Давлат грантлари 21 мингтадан 47 мингтага кўпайтирилгани, эҳтиёжманд оилаларга мансуб 2 минг нафар қизга олий ўқув юртларига кириш учун алоҳида грантлар ажратилгани ёшларимиз келажагини таъминлашга қаратилган амалий эътиборимиз намунасидир», — деди Президент.
Давлат раҳбари яқинда ташкил этилган Янги Ўзбекистон университети ҳақида ҳам гапирди.
«Мана, куни кеча мамлакатимизда яна бир олий таълим маскани — Янги Ўзбекистон университети ташкил этилди ва унга кўп йиллар Европадаги энг нуфузли университетлардан бирини бошқарган германиялик таниқли профессор ректор сифатида танланди.
Дунёнинг етакчи ўқув ва илмий ташкилотлари билан ҳамкорликда фаолият юритадиган ушбу университетга жорий йилда 300 нафар ёш қабул қилинади», — деди Шавкат Мирзиёев.
Изоҳ (0)