Видео: «Чилонзор» метро бекатида вагон эшиклари очилмай қолди

Тошкент метрополитенининг «Чилонзор» бекатида поезд вагонлари билан боғлиқ носозлик кузатилди, дея хабар бермоқда «Дарё» мухбири.

Маълум бўлишича, 27 июнь куни соат 12:50 да «Чилонзор» бекатига Сергели тарафдан кириб келган поезд составидаги тўртала вагоннинг эшиклари очилмай қолган.

Йўловчилар, тахминан, 10 дақиқа вагондан чиқа олмаган. Носозликни бартараф этиб бўлмагач, машинист хонаси орқали вагонларга кирган масъуллар эшикларни ичкаридан очиб чиққан.

Аввалроқ Тошкент метрополитенининг «Космонавтлар» бекатида шубҳали буюм топилгани ҳақида хабар берилган эди. Йўловчилар поезддан тушириб юборилиб, таркиб текшириш пунктига юборилган.

Қайд этиш жоизки, март ойидан буён Тошкент метрополитени билан боғлиқ шу каби воқеалар тез-тез юз бермоқда. Хусусан, 18 март куни  «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди.

9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди. Шу билан бирга, метрополитендаги ерости ва ерусти поезд ҳаракатларининг бир нечта бошқа видеолари ҳам ижтимоий тармоқларда кўп бора муҳокама қилинди. 28 апрель куни эса туннелда тўхтаб қолган поезд ҳақидаги видео тарқалди, унда йўловчилар рельслар орқали ҳаракатланиб, бекатга етиб олгани тасвирланган.

13 май куни «Амир Темур хиёбони» бекатида барча йўловчилар тушириб юборилганди.