Кўча санъати намунасини Inkuzart тахаллуси билан ижод қилаётган кўча рассоми Абдураҳмон Умаров ёзувчи, шоир, журналист, сиёсий арбоб ва Туркистон жадидчилигининг ғоявий етакчиларидан бири бўлган Абдурауф Фитрат хотирасига бағишланган стрит-арт чизди.
Тошкентнинг Чилонзор туманидаги Муқимий—Чилонзор кўчалари чорраҳасида жойлашган кўп қаватли уй деворида акс эттирилган ушбу ижод намунаси Абдулла Қодирий ва Чўлпон хотирасига бағишланган стрит-артнинг ёнига чизилган.
Кўча рассоми Абдулла Қодирий хотираси учун стрит-артни 19 апрелда чизиб, ёнига «Аҳволимиз» номли ғазалини ҳам туширганди. Чўлпон хотирасига бағишланган стрит-артни эса 19 июнь куни чизганди ва ёнига To be continued..., яъни «Давоми бор...» ёзувли табличка ҳам илиб кетганди.
2020 йилнинг ёзида Абдураҳмон Умаров Чилонзор туманидаги даҳаларни турли тасвирлар билан «бойитиш» ниятида эканини маълум қилганди. «Чилонзорни галереяга айлантирмоқчиман. Кейин эса бошқа туманлар, шаҳарлар, мамлакатлар ва қитъаларга ўтаман» — деган эди ўшанда.
Унинг сўзларига кўра, Чилонзор кўчаларида санъатга жой топиш қийин. Қонунчиликка кўра турар жой биноларининг деворларига чизишга рухсат берилмаган.
Изоҳ (0)