Шавкат Мирзиёев ташриф буюрган Сергелидаги «Саховат» маҳалласи ҳаёти — суратларда

Аввал хабар берилганидек, 25 июнь куни Ўзбекистон Президенти Шавкат Мирзиёев Тошкент шаҳрида амалга оширилаётган бунёдкорлик ишлари, корхоналар фаолияти билан танишди. Шунингдек, давлат раҳбари Сергели туманидаги Саховат маҳалласини бориб кўрди. 

2016 йилда ташкил этилган маҳаллада ҳозирда 41 та кўп қаватли уйда 6 минг нафардан зиёд аҳоли яшайди. Ҳудудда ижтимоий соҳа объектларидан 612 ўринли 2 та мактабгача таълим ташкилоти, 2 218 ўринли 1 та мактаб фаолият юритади.

Авваллари эътибордан четда қолган ушбу маҳалла 2021 йилда «Обод маҳалла» дастури доирасида ҳудуд тўлиқ ободонлаштирилган. Маҳалла гузари, Саховат боғи, савдо дўконлари барпо этилган. Йўлаклар тартибга келтирилиб, болалар ўйингоҳлари, автотураргоҳ ташкил қилинган.

Маҳалладаги ижтимоий муаммолар манзилли ҳал этилаётгани таъкидланди. Турар жойга муҳтожларга уй ва субсидиялар берилган. Ишсиз аёллар ва ёшлар бандлигини таъминлаш мақсадида қиймати 5 миллиард сўмлик лойиҳа амалга оширилмоқда. Хусусан, мебелсозлик мажмуасини ишга тушириш режалаштирилган.  «Темир дафтар»га тадбир бошидан 120 та оила (оила аъзолари – 421 нафар) киритилган. Дафтардан чиқарилган оилалар – 117 та (оила аъзолари – 410 нафар). Жумладан, ишга жойлаштирилганлар – 15 нафар, ўзини-ўзи банд қилишга кўмаклашилган – 108 нафар, тиббий ёрдам кўрсатилганлар – 29 нафар, моддий ёрдам олганлар – 132 нафар.

Маҳалладаги барча хонадонлар электр энергияси, табиий газ ва ичимлик сув билан тўлиқ таъминланган. 20,6 минг кв.м ички йўллар мавжуд бўлиб, шундан 15,1 минг кв.м қисми асфальт қилинган. 2020 йилда жиноятлар содир бўлмаган, жорий йилнинг ўтган даврида 5 та жиноят содир этилгани айтилган.

«Дарё» фотомухбири ушбу маҳаллада бўлиб, Президент ташрифи давомида эътиборга молик лаҳзаларни кадрларга муҳрлади.

Маҳалланинг аввалги ҳолати