Ўқишни ташлаганига қарамай, қилган меҳнатлари сабаб ўз соҳасида машҳурликка эришган юлдузлар ҳақида маълумот бериб ўтамиз.
Хоакин Феникс
«Оскар» мукофотининг совриндори 9 синфни базўр битиргани ҳақида ҳамма ҳам билавермаса керак. Болалигида ота-онаси кўп бор кўчиб юрган. Кейинчалик ота-она фарзандларини реклама суратга олиш жараёнларига жалб қилган. Шундан кейин Хоакин ва унинг акаси асосан уйда ўқиган, дарсларга деярли қатнашмаган. Шунга қарамай, бир лойиҳа учун бир неча миллион топадиган Фениксга «Жокер» фильми 4,5 миллион доллар олиб келган. Актёр даромадининг аксарият қисмини хайрия ишларига сарфлайди.
Николь Кидман
Билимга чанқоқ эканига қарамай, Николь онасида саратон аниқланганидан кейин ўқишни ташлашига тўғри келган. Онасига ундан бошқа қарайдиган одам бўлмаган. Пул топиши учун эса массажчи бўлиб ишлашга мажбур бўлган. Кинода суратга тушиши ва телевидениеда пайдо бўлиши ҳам айнан шу йилларга тўғри келган. 1989 йилдан кейин эса омади чопган ва унга суратга тушиш учун таклифлар кўпая бошлаган.
Квентин Тарантино
Режиссёр 15 ёшида мактабни тарк этган. Онаси бунга фақат иш топиш шарти билангина рухсат берган. Сўзининг устидан чиққан Квентин Торрансдаги маҳаллий кинозалда чипта сотувчи бўлиб ишлай бошлаган, шу билан бирга, Жеймс Бестанинг актёрлик маҳорати курсларида ҳам иштирок этган. Орадан бир неча йиллар ўтиб, Тарантино режиссёр сифатида танила бошлаган. Мутахассислар Квентин Тарантинонинг 2019 йилдаги молиявий аҳволини 120 миллион долларга баҳолаган.
Гарри Стайлс
Гарри 16 ёшида машҳур The Х Factor шоусида иштирок этган. Бироз вақтдан кейин One Direction’нинг аъзосига айланган. Фаолияти билан овора бўлиб қолган хонанда мактабни битирмаган. Санъатни танлаган Стайлс 2020 йилда 12 миллион фунт стерлинг (16.60764 доллар) даромад топган.
Jay-Z
Конференциялардан бирида ўрта мактаб ёки коллеж дипломи йўқлигини, шунга қарамай, ўқиш кераклигини таъкидлаган хонанда ишлаш зарурати билан мактабни охиригача битирмаган. Нью-Жерсидаги «Трентон» коллежини тарк этган рэпер бир муддат наркотик воситаларга илакишиб қолган. Вақтида ақлини йиғиб олган ва янги ҳаёт бошлашга қарор қилган. Бугунги кунда у хип-хоп йўналишида ижод қиладиган ижодкорлар орасида ягона миллиардер саналади.
Рианна
Хонанда Деф Жам Реcордингс билан тузилган шартнома сабаб 16 ёшида мактабни ташлаган. Синфдошларининг таъкидлашича, ёмон ўқимаган хонанда имкон бўлиши билан карьерани танлаган. Ночор оилада туғилиб ўсгани ва бозорда кийим сотишга тўғри келгани сабаб ҳам АҚШга кўчиб ўтиш таклиф қилинганида рад этмаган. Бугунги кунда эса у энг кўзга кўринган, машҳур хонандалардан бири саналади.
Мавзуга доир:
Изоҳ (0)