Samarqanddan Krasnodarga uchishi kerak bo‘lgan charter reys bir necha soatga ushlanib qoldi. “Samarqand xalqaro aeroporti” buning sababini bilmasligini aytmoqda

22-iyun kuni ijtimoiy tarmoqlarda Samarqand xalqaro aeroportidan Rossiyaning AzurAir aviakompaniyasi Krasnodar shahriga amalga oshirishi kerak bo‘lgan maxsus (charter) aviaqatnovi kechiktirilgani hamda 300 nafardan ortiq yo‘lovchi ovora bo‘layotgani ta’kidlangan videolavha tarqaldi. “Samarqand xalqaro aeroporti” ma’muriyati mazkur holat bo‘yicha rasmiy munosabat bildirdi.

Ta’kidlanishicha, rostdan ham 22-iyun kuni ertalab soat 09:00 da Samarqand xalqaro aeroporti orqali Rossiyaning Krasnodar shahriga maxsus aviaqatnov amalga oshirilishi belgilangan. Mazkur qatnovda 231 nafar yo‘lovchi uchib ketishi kerak bo‘lgan. Biroq AzurAir aviakompaniyasi tomonidan kun davomida aviaqatnov vaqti bir necha marotaba ortga surilgan. Buning sababi haqida hali rasmiy ma’lumot berilgani yo‘q.

Bu vaqt davomida aeroport xodimlari qatnovni kutib qolgan yo‘lovchilarga aerovokzalda mavjud imkoniyatlardan kelib chiqqan holda xizmat ko‘rsatishda davom etgan. O‘z navbatida AzurAir aviakompaniyasi ham ularga tushlik hamda kechki ovqatni tashkillashtirib bergan.

Samarqand—Krasnodar yo‘nalishidagi maxsus aviaqatnov kechki soat 02:11 da amalga oshirilgan. Qatnovga barcha yo‘lovchilar chiqarilgan, ro‘yxatdan o‘tish hamda chegara nazoratida muammoli holat kuzatilmagan.

“‘Samarqand xalqaro aeroporti’ MChJ samolyot hamda yo‘lovchilarga barcha zarur xizmatlarni taqdim etadi. Aviaqatnovlarni qoldirish yoki vaqtini ko‘chirish jamiyat vakolatiga kirmaydi”, — deyiladi xabarda.