Шавкат Мирзиёевнинг «Республика ҳудудларида мебелсозлик саноатини ривожлантиришга қаратилган чора-тадбирлар тўғрисида»ги қарори қабул қилинди.
Қарорга кўра, Инвестициялар ва ташқи савдо вазирлиги ҳамда бошқа манфаатдор вазирлик ва идоралар билан биргаликда икки ой муддатда қуйидагиларни назарда тутувчи «2021—2024 йилларда Ўзбекистонда мебель ва ёғочсозлик саноатини ривожлантириш дастури» лойиҳасини тасдиқлаш учун Вазирлар Маҳкамасига киритади:
- республика ҳудудларида қурилаётган кўп квартирали уй-жойларни аҳолининг талабидан келиб чиққан ҳолда биринчи навбатда, маҳаллий мебель маҳсулотлари билан жиҳозлаш бўйича истеъмол кредитларининг янги турлари ва пакетларини жорий қилиш;
- 2021—2024 йилларда республика ҳудудларидаги давлат ташкилотларининг, шу жумладан, мактабгача таълим, умумий ўрта ва ўрта махсус таълим ҳамда соғлиқни сақлаш муассасаларининг мебель жиҳозларини янгилаш графигини тасдиқлаш;
- мебель саноатининг барча йўналишларида хом ашё сифатида фойдаланиладиган дарахт турларини республика иқлим шароитини ҳисобга олган ҳолда етиштириш ҳамда республика мебель саноатида хом ашё сифатида фойдаланиладиган дарахт турлари плантацияларини барпо этиш;
- хорижий давлатлардаги (Хитой, Туркия ҳамда Европа давлатлари) йирик мебель ишлаб чиқарувчи компаниялар томонидан республикада ишлаб чиқариш қувватларини ишга тушириш;
- Инновацион ривожланиш вазирлиги «Ўзкимёсаноат» АЖ билан биргаликда республика ҳудудларида МДФ плиталари, ҲПЛ панеллар, ҳамда мазкур қарорнинг иловасида кўрсатилган хом ашё, эҳтиёт қисмлар, фурнитура ва аксессуарлар ишлаб чиқаришга қаратилган лойиҳаларни амалга ошириш.
Қарорга мувофиқ, 2021—2022 йилларда қишлоқ хўжалигида фойдаланишдан чиқиб кетган жами 3173 гектар захирадаги ерларда ҳамда ўрмон фондининг жами 1 327 гектар тоғолди ва адир ерларида ёнғоқ, чинор, шумтол, қайрағоч ҳамда бошқа мебелбоп дарахт турлари экилади.
Мазкур плантацияларни ташкил этиш учун жами 2 783 600 дона кўчат етиштириш назарда тутилган.
Бундан аввал Ўзбекистонда ёғоч импорти ҳажми камайтирилиши ҳамда Ўзбекистонда дарахт экиб, парвариш қилмаган мутасадди ташкилотларни жаримага тортиш таклиф қилингани ҳақида хабар берилганди.
Изоҳ (0)