Koronavirus pandemiyasi va qurg‘oqchilik sababli hind choyining narxi qimmatlashmoqda
Hindiston choyining hosili 2021-yilda xavf ostida qoldi. Bu mamlakatdagi issiq havo, qurg‘oqchilik va koronavirus infeksiyasining keng tarqalishi bilan bog‘liq, deb yozmoqda Financial Times nashri.
Hukumat ma’lumotlariga ko‘ra, choy ishlab chiqarishda yetakchi bo‘lgan Assam shtatidagi eng kamida 90 ta choy plantatsiyalarida umumiy hisobda o‘simliklarning koronavirus bilan zararlanishi bo‘yicha 500 ta holat ro‘yxatga olindi.
Plantatsiya egalarining so‘zlariga ko‘ra, virus tarqalishining haqiqiy ko‘lamini bilish uchun qo‘shimcha tekshiruvlar o‘tkazish talab etiladi. Bundan tashqari, 2021-yilda Assam hamda Hindistonning choy yetishtiriladigan shimoli-sharqiy hududlari kuchli qurg‘oqchilik muammosiga duch keldi.
Ishlab chiqaruvchilarning ta’kidlashicha, koronavirus tarqalishi o‘z vaqtida nazoratga olinmasa, qurg‘oqchilik bilan birga bu muammo salbiy oqibatlarga olib kelishi, natijada Hindiston choyining narxi ko‘tarilishi mumkin. Choy ishlab chiqaruvchi Van Rees kompaniyasining hisob-kitoblariga ko‘ra, Shimoliy Hindistonda choy sanoati 2021-yilning mart oyida 47 million kilogrammni tashkil qildi. Bu ko‘rsatkich 2020-yilga taqqoslaganda ko‘p, lekin 2019-yilga nisbatan sezilarli darajada kam hisoblanadi. Oziq-ovqatlar sohasiga ixtisoslashgan Mintec tahlilchi kompaniyasining ma’lumotlariga ko‘ra, 2021-yilning aprel oyida eng yirik eksport markazi bo‘lgan Kalkutta shahrida choyning narxi oldingi oylarga taqqoslaganda 40 foizdan ortiqqa qimmatlashdi.
Hindiston choy ishlab chiqarish ko‘lamining kattaligi bo‘yicha Xitoydan keyin ikkinchi o‘rinda turadi. 2020-yilda sanoat noqulay ob-havo va pandemiya sababli jiddiy zarar ko‘rdi. Mintec tahlilchisi Ibi Idoniboyening aytishicha, Hindiston choyi bilan bog‘liq muammolar ko‘proq choy yetkazib berish imkoniyatiga ega bo‘lgan Shri-Lanka hamda Rossiya kabi boshqa choy ishlab chiqaruvchilar uchun qo‘shimcha imkoniyatlar yaratishi mumkin.
Bundan oldin Bixar shtati aholisi o‘zlari cho‘miladigan va suv ichadigan daryodan 100 kishining jasadini topgani haqida ma’lum bo‘ldi. Ularning o‘limiga koronavirus infeksiyasi sabab bo‘lishi mumkinligi aytilmoqda. Shundan keyin Hindiston hukumati o‘liklarni daryoga tashlashni darhol to‘xtatishni talab qildi.
Hindiston hukumati o‘liklarning suvga noqonuniy ravishda tashlanishining oldini olish maqsadida Ganga daryosiga to‘rlar o‘rnatgani haqida xabar berilgandi.
Ma’lumot uchun, Hindiston koronavirus bilan kasallanganlar soni bo‘yicha dunyoda ikkinchi o‘rinni egallab turibdi. Avvalroq Hindistonda koronavirusdan sog‘ayganlarda “qora zamburug‘” tarqalishi qayd etilgan edi.
