Бектемир Мелиқўзиевнинг бугунги жанги, Англия терма жамоасидан рекордлар ва кетиши кутилаётган Абрамов. Энг сўнгги спорт янгиликлари

Дунё ва ўзбек спортига оид 19 июнь тонгининг муҳим хабарлари дайжести билан танишинг.

Ўзбекистон

Бугун Вадим Абрамовнинг терма жамоадаги келажаги ҳал бўлади. 19 июнь куни МОҚ мажлислар залида ЎФАнинг навбатдан ташқари йиғилиши бўлиб ўтади. Катта эҳтимол билан унда Ўзбекистон терма жамоаси бош мураббийи масаласи кўриб чиқилади.

Бокс

Бектемир Мелиқўзиев проф боксдаги навбатдаги жангини ўтказади

Профессионал бокснинг супер ўрта вазн (-76,2 кг) тоифасида рингга чиқаётган ўзбекистонлик Бектемир Мелиқўзиев (7-0, 6 КО) ўзининг навбатдаги жангини америкалик Габриэль Росадога (25-13, 14 КО) қарши ўтказади. Жанг ўтказиладиган мусобақа Тошкент вақти билан 19 июндан 20 июнга ўтар кечаси 00:30 да бошланади.

Жаҳон

Евро—2020 доирасидаги 18 июнь кунги ўйинларда Швеция Словакия устидан минимал ҳисобдаги ғалабани қўлга киритди. Хорватия ва Чехия ўртасидаги ўйин 1:1 ҳисобидаги дуранг билан тугади. Англия — Шотландия учрашувида эса ҳисоб очилмади.

Англия терма жамоаси 1999 йилдан буён шотландларга ютқазмаяпти. 22 йил аввалги баҳсда Шотландия 1:0 ҳисобида ғалаба қозонганди. Англия бу ўйинда Евро ва ЖЧ тарихидаги энг ёш таркибини майдонга туширди — 25 ёш-у 31 кун.

Шунингдек, бу Англия учун Евро ва ЖЧ тарихидаги 17-нурсиз дуранг бўлди. Бу борада инглизлар рекордчи ҳисобланади.

Эриксен шифохонадан чиқди

Дания терма жамоаси ва «Интер» ярим ҳимоячиси Кристиан Эриксен шифохонадан чиқди. 29 ёшли операциядан муваффақиятли ўтган, унинг юрагига кардиовертер-дефибриллятор ўрнатилган. Эриксен жума куни терма жамоа базасига борган ва шундан кейин уйига йўл олган.

Златан ҳам операция қилинди. «Милан» ҳужумчиси тиззасидан операция қилинди. Қайд этилишича, футболчининг тикланишига икки ой вақт кетади ва Златан мавсум стартига қадар майдонга тушишга тайёр бўлади. У жароҳат сабаб Евро—2020 ни ўтказиб юборганди.

Серхио Рамос янги жамоа излашда давом этмоқда. Журналист Хосеп Педреролга кўра, футболчи «Милан» билан музокара ўтказган. 35 ёшли футболчи янги жамоасидан 2 йиллик шартнома ва йилига 15 миллион евро маош сўрамоқда. Бундан ташқари Рамос 20 миллион евро кўтарма пули олиш истагида.

«ПСЖ» Пол Погбага қизиқиш билдирмоқда

Le Parisien нашрининг хабар қилишича, «ПСЖ» Погба билан боғлиқ вазиятни кузатмоқда. Ўтган ҳафтада Погбанинг агенти парижликлар президенти Носсир ал-Ҳалайфи билан учрашган. Унда Мойзе Киннинг қолиши ва Баккернинг кетиши муҳокамаси билан биргаликда Погба трансфери ҳақида ҳам сўз боргани айтилмоқда. «Манчестер Юнайтед» Погба билан 2022 йилга қадар мўлжалланган шартномани узайтириш ниятида, бироқ футболчи бунга кўнмаяпти.