Самарқанд вилоятида ўзгаларнинг банк картларидан пул ечиб олган йигит ушланди, дея хабар бермоқда ИИВ матбуот хизмати.
Маълум бўлишича, Қорақалпоғистоннинг Нукус шаҳрида яшовчи фуқаро Д.К. 2021 йилнинг 15 март куни Нукус шаҳар ички ишлар бўлимига мурожаат қилган. Аризага кўра, 14 март куни қизи Н.Р.нинг Instagram ижтимоий тармоғидаги профилига Giveaway-asal ва @asalshodieva_dar1t номи билан очилган номаълум профил эгаси томонидан «Сиз 200 000 сўм пул мукофотини ютиб олдингиз» деган мазмундаги ёзма хабарнома келган.
Қиз профил ортидаги номаълум шахс билан ёзишма жараёнида унинг алдовларига ишониб, ўзига тегишли UzCard банк картасининг коди ва паролини ёзиб бергани, сўнг шу куни соат 21:00 ларда банк картасида мавжуд бўлган жами 600 000 сўм миқдордаги пули йўқолган.
Ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, олиб борилган тезкор тадбирлар натижасида ушбу жиноятни содир этган шахс Самарқанд шаҳрида яшовчи 2003 йилда туғилган фуқаро А.А. экани аниқланди.
Ҳозирда ушбу фуқаронинг бошқа турдош жиноятларга алоқадорлиги текширилмоқда.
«Ички ишлар вазирлиги яна бир бор огоҳлантиради, банк карталарингизнинг коди ва паролини ҳеч қандай шароитда, ҳеч кимга маълум қилманг, содда бўлманг, фирибгарларнинг найрангларига тушиб қолманг», — дейилади ИИБ хабарида.
Бундан аввал Бухорода фуқародан пул талаб қилган сохта Миллий гвардия ходими қўлга олингани, Тошкентда сержантлар тайёрлаш мактабига 12 минг долларга ўқишга киритиб қўймоқчи бўлганлар ушлангани ҳамда Андижонда ўғлининг фермер хўжалигига тегишли 10 сотих ерни 6 минг долларга сотмоқчи бўлган шахс қўлга олингани ҳақида хабар берилганди.
Изоҳ (0)