Тошкент ҳайвонот боғига ЖАР (Африка)дан Жони ва Женни лақабли иккита саккиз ойлик оқ шер болалари олиб келинди, деб хабар бермоқда пойтахт ҳайвонот боғи матбуот хизмати.
Қайд этилишича, оқ шер — бу шерларнинг алоҳида туркуми эмас, балки «лейкизм» номи остида маълум бўлган мутация натижасидир. Улар албинос эмас. Уларнинг кўзлари ва териси нормал тусда. Ранги кўзга ташланадиган бўлгани сабабли ёввойи табиат қўйнида яшаш улар учун жуда мураккаб масала ва бу ов қилишда халақит беради. Улар осонгина бошқа йиртқичлар ва браконьерларнинг ўлжасига айланади. Бутун дунё бўйича уларнинг сони атиги 300 тага етади, шунинг ҳам катта қисми ҳайвонот боғларида.
«Бизнинг оқ шерчаларимиз эса волеримизга чиқариб юборилди. Момиқвойларимиз сони кўпайганидан биз жуда мамнунмиз. Бундай ноёб жониворларни асраб қолиш ва уларга ғамхўрлик қилиш эса биз учун катта шараф», — дейилади хабарда.
Изоҳ (0)