Ўзбекистон ташқи ишлар вазири Абдулазиз Комилов дипломатик форумда иштирок этиш учун Анталияга бориши ҳақида хабар берилган эди. ТИВ матбуот хизмати 18 июнь куни Анталияга амалий ташриф билан борган Ўзбекистон ташқи ишлар вазири Абдулазиз Комилов Покистон ташқи ишлар вазири Шоҳ Маҳмуд Қурайший билан учрашганини маълум қилди.
Қайд этилишича, музокараларда кўп қиррали Ўзбекистон—Покистон муносабатларининг ҳолати ва ривожланиш истиқболлари атрофлича муҳокама қилинди.
2021 йил 14 апрелда бўлиб ўтган Ўзбекистон Президенти Шавкат Мирзиёев ва Покистон бош вазири Имрон Хон ўртасидаги саммит якунлари бўйича эришилган келишувлар ва имзоланган битимларни, шунингдек, соғлиқни сақлаш, таълим ва туризм соҳаларидаги қўшма лойиҳаларни амалга оширишнинг муҳимлиги таъкидланди.
Минтақавий масалалар, биринчи навбатда, Афғонистонда тинчлик ва барқарорликни таъминлаш, ижтимоий-иқтисодий ва инфратузилма лойиҳаларини биргаликда амалга ошириш орқали иқтисодиётини тиклашга алоҳида эътибор қаратилди.
Ташқи ишлар вазирликлари раҳбарлари 2021 йил 15—16 июль кунлари Тошкент шаҳрида бўлиб ўтадиган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференцияда Покистон томони иштирокининг амалий жиҳатларини кўриб чиқди.
Музокаралар чоғида томонларни қизиқтирган икки томонлама кун тартибининг бошқа масалалари бўйича ҳам фикр алмашилди.
Эслатиб ўтамиз, Туркия Ташқи ишлар вазирлиги томонидан ўтказиладиган Дипломатик форум 19 июнь куни ҳам давом этади. Форум доирасида Ўзбекистон делегацияси икки томонлама учрашувлар ҳам ўтказади.
Изоҳ (0)