Тошкент вилояти Янгийўл туманида йўлнинг қатнов қисмига ётиб олган пиёдани босиб кетиб, воқеа жойидан яширинган Nexia ҳайдовчиси қўлга олинди. Бу ҳақда ИИВ ЙҲХББ ахборот хизмати хабар берди.
Маълум қилинишича, 7 июнь 22:20 ларда Янгийўл шаҳар ИИБ навбатчилик қисмига ўлим билан боғлиқ ЙТҲ бўйича хабар келиб тушган. Унга кўра, Тошкент—Душанбе халқаро автомобиль йўлининг Янгийўл шаҳар ҳудудидан ўтган 25-километрида номаълум ҳайдовчи номаълум транспорт воситасида йўлнинг қатнов қисмига ётиб олган пиёдани босиб кетган.
Ҳайдовчи жабрланувчига ёрдам кўрсатмай, воқеа жойидан кетиб қолган. «Ниёзбоши» ҚФЙда яшаган 36 ёшли пиёда эса воқеа жойида вафот этган.
ИИБ ходимлари томонидан олиб борилган тезкор тадбир давомида ушбу ҳудудда жойлашган корхона ва ташкилотларга тегишли камераларнинг видеолари ўрганиб чиқилган. Шундан сўнг ЙТҲ содир этган автомобиль ва унинг ҳайдовчиси аниқланган.
Маълум бўлишича, аварияни Ниёзбоши қишлоғида яшовчи, 2001 йилда туғилган А. исмли фуқаро ўзининг Nexia русумли автомобилида содир этган.
«Нима борлигини кўрмадим, бир нарсанинг устидан ўтиб кетдим. Машинани ўнг тарафга олгандим, орқадан кимдир бақирди. Бундан қўрқиб, қочиб кетдим», — дейди ҳайдовчи.
Аввалроқ Тошкентда юз берган йирик ЙТҲ иштирокчиси бўлган ҳайдовчи воқеа жойидан қочиб кетгани маълум қилинган эди.
Изоҳ (0)