Болаларнинг шодон чеҳраси, қувноқ кулгисини кўрганда завқи келмайдиган, қалби ёришмайдиган одам бўлмаса керак дунёда. Бола қувончи ва кулгиси энг жиддий, ҳаттоки унча-мунча тошбағир кишининг ҳам кўнглини юмшатади. Руҳшунос олимларнинг таъкидлашича, кулиб турган болакайдан атрофга ижобий қувват ёйилар экан.
Биз бир йўла юздан ортиқ кулиб, қувнаётган болажонлардан завқланиб, ижобий қувватни ҳис қилдик. Бу болажонлар Тошкент вилояти, Зангиота туманидаги «Ибрат» маҳалласида яшайди ва кечагина улар учун маҳалла ҳудудида қурилган чиройли, замонавий арғимчоқлар, сирпанма, тирмашма қурилмалар, турли баландликдаги турниклар билан жиҳозланган, юмшоқ чим тўшама ётқизилган болалар майдончаси фойдаланишга топширилди. Майдончанинг тантанали очилиш маросими ҳақиқий шодиёнага айланди. Болажонлар, айниқса, оналарнинг қувончлари чексиз эди.
Бу хайрли иш ташаббускорлари Ўзбекистон Республикаси Миллий гвардияси қўриқлаш бош бошқармаси ҳамда Enter Engineering компаниялар гуруҳи бўлиб, бу икки ташкилот саъй-ҳаракати билан «Ибрат» маҳалласи ҳудудидаги қаровсиз ётган 300 квадрат метрлик жой тозаланиб, текисланди ва болалар майдончаси бунёд этилди. Бундан ташқари, майдонча теварак-атрофи ободонлаштирилиб, яшил ҳудуд барпо этилди.
«Маҳалламизда аҳоли эҳтиёжи учун хизмат қилувчи кўплаб иншоотлар бўлсада, айнан болалар майдончаси йўқ эди. Айнан шундай жойга эҳтиёжимиз жуда катта эди. Бу майдонча кичик ёшдаги болаларимизнинг боғча, мактабдан бўш вақтини мазмунли ўтказиши учун хизмат қилади. Бу хайрли иш ташаббускори ва ташкилотчиси бўлган Enter Engineering компанияси ва бошқа масъулларга маҳалладошларимиз номидан миннатдорчилик билдирамиз», — дейди «Ибрат» маҳалла фуқаролар йиғини раиси Машрабжон Қодиров.
Майдончанинг очилиши муносабати билан бўлиб ўтган тантанали маросимда Ўзбекистон Республикаси Миллий гвардияси қўмондони ўринбосари полковник М. Ғаниев, Миллий гвардиянинг Тошкент вилояти бошқармаси бошлиғи, полковник Д. Нортожиев, Тошкент вилояти ҳокими ўринбосари, Маҳалла ва оилани қўллаб-қувватлаш бошқармаси бошлиғи I. Ибрагимов, Зангиота тумани Миллий гвардияси бошлиғи, туман ҳокимининг ўринбосари С. Носиров, туман кенгаши депутати З. Бойсариев ва Enter Engineering компаниялар гуруҳи PR-хизмати иштирок этди.
Enter Engineering матбуот хизмати
Изоҳ (0)