Олий Мажлис Сенати раиси Танзила Норбоева Ўзбекистонда амалга ошириладиган халқаро лойиҳаларнинг муваффақиятли давом эттирилиши учун норматив-ҳужжатлар қабул қилиш кераклигини таъкидлади. Бу ҳақда Сенат раиси 15 июнь куни Тошкентда бўлиб ўтган Марказий Осиё ва Афғонистонда хотин-қизларнинг иқтисодий ҳуқуқ ва имкониятларини кенгайтиришга қаратилган халқаро форумда гапирган, дея хабар беради «Gazeta.uz».
«Вазирлар Маҳкамасининг қарори билан эндиликда Ўзбекистонда ишлаб чиқилаётган барча норматив-ҳуқуқий ҳужжатлар гендер экспертизасидан ўтмоқда. Бугун агар бирорта қонун аёлларимиз манфаатига зид равишда ишлаб чиқилган бўлса, у қабул қилинмайди», — дейди Сенат раиси ўз нутқида.
Танзила Норбоева халқаро ташкилотлар томонидан Ўзбекистонда амалга ошириладиган лойиҳаларнинг муваффақиятли давом этиши учун норматив ҳужжат қабул қилиш амалиётини киритиш кераклигини таъкидлаган.
«Халқаро ташкилотлар, халқаро молиявий институтлар кўмагида самарали амалиётга татбиқ этилган лойиҳаларнинг барқарорлигини таъминлаш учун тегишли норматив-ҳуқуқий ҳужжат қабул қилиниши ва ушбу лойиҳаларни кенг ёйиш мақсадга мувофиқ бўлар эди. Чунки лойиҳа тугагандан кейин иш тўхтаб қолади, худди бошқа давлатларда бўлгани каби Ўзбекистонда ҳам. Шунинг учун, муваффақиятли тажрибани давом эттириш учун қандайдир норматив-ҳужжат қабул қилиш керак. У лойиҳа ютуқларини ва натижаларини мамлакатимизнинг бошқа ҳудудларида ҳам тадбиқ этишга ёрдам беради», — дейди Сенат раиси.
«Бугун давлатларимиз раҳбарлари биргаликда ишлаётганларидек, Марказий Осиё ва Афғонистоннинг етакчи аёллари ҳамкорликнинг устувор йўналишларини аниқлаш учун йиғилишлари керак», — дея қайд этади Норбоева.
Эслатиб ўтамиз, май охирида ўтказилган Олий Мажлис Сенатининг ўн бешинчи ялпи мажлисида Ўзбекистонда 2030 йилга қадар гендер тенгликка эришиш стратегияси кўриб чиқилган эди.
Изоҳ (0)