Ўзбекистон миллий терма жамоаси бош мураббийи Вадим Абрамов ЖЧ—2022 ва Осиё Кубоги—2023 қўшма саралаши доирасида Саудия Арабистонига қарши ўйин олдидан матбуот анжуманида иштирок этди ва учрашув ҳақидаги фикрлари билан ўртоқлашди.
Ҳамма тушуниб турибди, эртага жуда муҳим учрашув бўлади. Тайёргарлик яхши ўтди. Жароҳатлар йўқ. Қум бўрони сабаб кеча майдонда машғулот ўтказа олмадик. Лекин билишимча, рақибларимиз ҳам майдонга чиқа олмади. Шунинг учун бу муаммо иккимизга ҳам тегишли.Жамоаларнинг Тошкентда ўтган илк ўйинида Саудия Арабистони сўнгги дақиқаларда ғалабани илиб кетганди (3:2).Саудия Арабистони терма жамоаси ҳақида фақат ижобий фикр билдира оламан. Улардан эҳтиёт бўлиш нормал ҳолат. Лекин Тошкентдаги ўйинни эслашни хоҳламасдим. Чунки ўшандаги натижа ўйинга мос бўлмаган. Эртанги учрашув қайси терма жамоа кучли эканлигини кўрсатади.
Дастлабки икки ўйиндаги стадионимизда чим ўзига хос эди, тепароқ эди. Тўп ҳаракати секинлашди. Бугун мана янги стадионни кўрамиз. Саудиянинг ўйин видеоларини кўриб чиққанимда амин бўлдимки, бу ерда чим ҳолати қулай. Бу билан боғлиқ муаммо бўлмаса керак.
Вадим Абрамов, Ўзбекистон миллий терма жамоаси бош мураббийи
Шунингдек, Саудия устози Эрве Ренар ҳам ўйин олдидан ўз фикрлари билан ўртоқлашди.
«Сингапур билан ўйин кўрсатди, бизнинг гуруҳ жуда кучли. Энди олдинда энг муҳим ўйинимиз кутиб турибди. Ўзбекистонни жуда ҳурмат қиламиз. Бу кучли жамоа. Айниқса Тошкентдаги учрашув жуда рақобатли кечганди. Иккала жамоа ҳам кейинги босқичга лойиқ. Бироқ футболда ҳар хил ҳолатлар бўлади. Бизнинг мақсад биринчи ўринни олиш.
Йўқотишлар? Салим ал-Довсари бизнинг асосий ўйинчилардан бири эди. Унинг майдонга туша олмаслиги катта йўқотиш. Бироқ футбол жамоавий спорт ва мураббийнинг вазифаси ана шундай вазиятларда муаммони бартараф этиш ва бунинг ўйинга салбий таъсирини камайтириш», — дейди Эрве Ренар.
Саудия Арабистони ва Ўзбекистон ўртасидаги учрашув 15 июнь, сешанба куни Тошкент вақти билан 23:00 да бошланади. Қайд этиш жоиз, мазкур учрашув ғолиби гуруҳда биринчи ўринни эгаллайди.
Изоҳ (0)