Президент Шавкат Мирзиёев 10 июнь куни «Вазирлар Маҳкамаси фаолиятини такомиллаштиришга оид қўшимча чора-тадбирлар тўғрисда»ги қарорни имзолади.
Унга кўра, бошқарув ходимларининг умумий чекланган сони 269 нафар, техник ходимлар сони эса 52 нафар этиб белгиланган. Бундан олдинги структурада ходимлар сони мос равишда 262 ва 49 нафардан эди.
Хусусан, қарор билан бош вазир ўринбосари — туризмни ривожлантириш давлат қўмитаси раиси лавозими тугатилиб, бош вазир ўринбосари — туризм ва спорт вазири лавозимлари киритилган.
Спорт ва туризмни ривожлантириш масалалари котибияти Туризм, спорт, маданият ва оммавий коммуникациялар масалалари котибияти этиб қайта номланган ва унинг бошқарув ходимларининг умумий чекланган сони 15 нафар этиб белгиланган. Бунда, қўшимча ажратилган 3 та штат бирлиги Жисмоний тарбия ва спорт вазирлиги ҳамда Туризмни ривожлантириш давлат қўмитасининг қисқартирилган ходимлари сони ҳисобига шакллантирилган.
Шунингдек, Таълим, соғлиқни сақлаш, маданият, ёшлар, маънавият ва жамоат ташкилотлари, маҳалла ва оилани қўллаб-қувватлаш масалалари котибияти Таълим, соғлиқни сақлаш, ёшлар, маҳалла ва оилани қўллаб-қувватлаш масалалари котибияти этиб қайта номланган ҳамда унинг бошқарув ходимларининг умумий чекланган сони 18 нафар этиб белгиланган.
Бундан ташқари, Вазирлар Маҳкамаси ижро этувчи аппарати тузилмасида бошқарув ходимларининг умумий чекланган сони 17 нафардан иборат бўлган Маҳаллий саноатни ривожлантириш ва кооперация алоқалари масалалари котибияти ташкил қилинган бўлиб, улардан 6 та штат бирлиги Вазирлар Маҳкамасининг умумий штат бирликлари доирасида ва 11 та штат бирлиги Иқтисодий тараққиёт ва камбағалликни қисқартириш вазирлигининг штат бирликлари ҳисобига шакллантирилган.
Эслатиб ўтамиз, Президент Шавкат Мирзиёев 3 апрель куни давлат ҳокимияти ва бошқаруви органларининг штат бирликлари сонини қисқартириш тўғрисидаги қарорни имзолаганди. Қарорга мувофиқ, 2021 йил 1 майдан давлат органлари ходимларининг сони 15 фоизгача мақбуллаштирилади. Натижада давлат ҳокимияти ва бошқаруви органлари ҳамда уларнинг идоравий ва ҳудудий бўлинмаларида жами 5288 та штат қисқаради.
Изоҳ (0)