Prezident Shavkat Mirziyoyev 10-iyun kuni “Vazirlar Mahkamasi faoliyatini takomillashtirishga oid qo‘shimcha chora-tadbirlar to‘g‘risda”gi qarorni imzoladi.
Unga ko‘ra, boshqaruv xodimlarining umumiy cheklangan soni 269 nafar, texnik xodimlar soni esa 52 nafar etib belgilangan. Bundan oldingi strukturada xodimlar soni mos ravishda 262 va 49 nafardan edi.
Xususan, qaror bilan bosh vazir o‘rinbosari — turizmni rivojlantirish davlat qo‘mitasi raisi lavozimi tugatilib, bosh vazir o‘rinbosari — turizm va sport vaziri lavozimlari kiritilgan.
Sport va turizmni rivojlantirish masalalari kotibiyati Turizm, sport, madaniyat va ommaviy kommunikatsiyalar masalalari kotibiyati etib qayta nomlangan va uning boshqaruv xodimlarining umumiy cheklangan soni 15 nafar etib belgilangan. Bunda, qo‘shimcha ajratilgan 3 ta shtat birligi Jismoniy tarbiya va sport vazirligi hamda Turizmni rivojlantirish davlat qo‘mitasining qisqartirilgan xodimlari soni hisobiga shakllantirilgan.
Shuningdek, Ta’lim, sog‘liqni saqlash, madaniyat, yoshlar, ma’naviyat va jamoat tashkilotlari, mahalla va oilani qo‘llab-quvvatlash masalalari kotibiyati Ta’lim, sog‘liqni saqlash, yoshlar, mahalla va oilani qo‘llab-quvvatlash masalalari kotibiyati etib qayta nomlangan hamda uning boshqaruv xodimlarining umumiy cheklangan soni 18 nafar etib belgilangan.
Bundan tashqari, Vazirlar Mahkamasi ijro etuvchi apparati tuzilmasida boshqaruv xodimlarining umumiy cheklangan soni 17 nafardan iborat bo‘lgan Mahalliy sanoatni rivojlantirish va kooperatsiya aloqalari masalalari kotibiyati tashkil qilingan bo‘lib, ulardan 6 ta shtat birligi Vazirlar Mahkamasining umumiy shtat birliklari doirasida va 11 ta shtat birligi Iqtisodiy taraqqiyot va kambag‘allikni qisqartirish vazirligining shtat birliklari hisobiga shakllantirilgan.
Eslatib o‘tamiz, Prezident Shavkat Mirziyoyev 3-aprel kuni davlat hokimiyati va boshqaruvi organlarining shtat birliklari sonini qisqartirish to‘g‘risidagi qarorni imzolagandi. Qarorga muvofiq, 2021-yil 1-maydan davlat organlari xodimlarining soni 15 foizgacha maqbullashtiriladi. Natijada davlat hokimiyati va boshqaruvi organlari hamda ularning idoraviy va hududiy bo‘linmalarida jami 5288 ta shtat qisqaradi.
Izoh (0)