Давлат хизматлари агентлиги ходимларининг аҳолига хизмат кўрсатиши учун қуриб битказилган 147-марказ Қашқадарё вилоятининг Деҳқонобод туманида иш бошлади, дея хабар берди «Дарё» мухбири.
Таъкидланишича, туманда фаолиятини бошлаган Давлат хизматлари агентлигининг янги биноси очилишида Европа Иттифоқининг Ўзбекистондаги делегацияси раҳбари Шарлотта Адриан ва БМТ ТДнинг Ўзбекистондаги доимий вакили Матилда Димовскалар иштирок этган.
Марказ очилишида сўз олган туман ҳокими Зоир Алиқулов туманда фаолиятини бошлаган замонавий бинода аҳолига 150 турдан ортиқ давлат хизматлари кўрсатилишини таъкидлаб, эътибор учун ташкилотчиларга миннатдорлик изҳор қилган.
Тадбирда таъкидланишича, Деҳқонободда иш бошлаган Давлат хизматлари марказининг янги биноси 4 миллиард 582 миллион сўмга қуриб битказилган бўлиб, мазкур бино республикада давлат хизматлари агентлиги ходимлари учун қуриб фойдаланишга топширилган 147-бино ҳисобланади.
«Деҳқонобод тумани Европа Иттифоқи, Давлат хизматлари агентлиги, БМТТД ҳамкорлигидаги ‘Ўзбекистоннинг қишлоқ ҳудудларида давлат хизматларини тақдим этишни такомиллаштириш ва бошқарув даражасини ошириш’ қўшма лойиҳаси доирасида синов ҳудудлари сифатида танлаб олинган еттита ҳудудлардан бири ҳисобланади. Шу сабаб марказда хотин-қизларни қўллаб-қувватлаш маркази ҳам ўз фаолиятини бошлайди. У ерда аёллар бизнесни бошлаш ва юритиш, ҳуқуқий масалалар, бепул психолог маслаҳати ва ёрдамини олишлари мумкин бўлади», — дейди туман ҳокими Зоир Алиқулов.
Изоҳ (0)