Амалдорларнинг даромадларини декларация қилинишини назарда тутувчи қонун лойиҳасида давлат хизматчиларининг ўз вазифаларини бажариш вақтида юзага келиши мумкин бўлган бир қатор масалалар тартибга солиниши кўзда тутилмоқда. Бу ҳақда Коррупцияга қарши курашиш агентлиги матбуот котиби Дурдона Очилова «Дарё»га маълум қилди.
Аввалроқ Коррупцияга қарши курашиш агентлиги «Давлат хизматчиларининг даромадлари, мол-мулкини декларация қилиш ва манфаатлар тўқнашуви тўғрисида»ги қонун лойиҳасини ишлаб чиққани ҳақида хабар берилган эди. Лойиҳада мансабдор шахсларнинг барча даромадлари ва харажатлари декларация қилиниши назарда тутилган.
Мавзуга доир: Ўзбекистонда Президентга ҳам йил давомида ишлаб топган пули ҳақида ҳисобот топшириш мажбурияти юклатилиши мумкин
- давлат хизматчиларининг даромадлари ва мол-мулкини декларация қилиш ҳамда манфаатлар тўқнашуви соҳасидаги муносабатларни тартибга солишнинг умумий қоидалари;
- давлат хизматчиларининг даромадлари ва мол-мулки тўғрисида декларацияларни тақдим этиш ва уларни эълон қилиш тартиби;
- давлат хизматида манфаатлар тўқнашувининг олдини олиш ва уларни ҳал қилишнинг механизмлари;
- давлат хизматчисининг вазифаларини бажариш вақтидаги тақиқлар;
- совғалар олиш ва бериш билан боғлиқ чекловлар.
Эслатиб ўтамиз, Ўзбекистонда 2020 йил 1 январдан бошлаб давлат хизматчилари айрим тоифаларининг мол-мулкини, даромадлари ва харажатларини декларациялаш тизимини босқичма-босқич, уч йил ичида жорий этиш режалаштирилган эди. Бу ҳақдаги тегишли президент қарори лойиҳаси 2019 йил октябрь ойида жамоатчилик муҳокамаси учун эълон қилинган эди.
Кейинчалик бу тизимни жорий этишнинг бошланиши 2021 йил январига қадар кечиктирилгани, жорий этиш муддати эса беш йилгача узайтирилгани маълум бўлди. Бироқ 2021 йил июнь ойи ҳолатига кўра тизим ҳали ҳам ишга тушмаган; 2021 йил мартида тегишли қонун лойиҳаси Президент маъмуриятига киритилгани маълум бўлди.
Қайд этиш жоиз, қонун лойиҳасида мамлакат президентига ҳам йил давомида ишлаб топган пули ҳақида ҳисобот топшириш мажбуриятини юклаш ҳақидаги норма киритилгани маълум қилинган.
Изоҳ (0)