Андижон вилояти Избоскан туманида фермер хўжалигига қарашли ерини сотмоқчи бўлган шахс ушланди. Бу ҳақда Бош прокуратура ҳузуридаги департамент хабар берди.
Фото: Бош прокуратура ҳузуридаги Департамент
Маълум қилинишича, Бош прокуратура ҳузуридаги департамент ҳамда ДХХнинг Избоскан тумани бўлимлари томонидан тезкор тадбир ўтказилган. Тадбирда фуқаро И.Қ. бошқа бир фуқарога ўғли раҳбарлигидаги «Б» фермер хўжалигига тегишли 0,10 гектар пахта экин майдонини 6 минг долларга сотмоқчи эканлиги аниқланган. И.Қ. келгусида кадастр тизимида ишловчи танишлари орқали турар жой қуриш учун ҳужжатларни расмийлаштириб беришни ваъда қилиб, 5 минг долларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкентда ер олиб беришни ваъда қилиб, фуқародан 52 800 доллар олган шахс ушлангани, Андижонда 100 гектар ер ажратиб бериш эвазига 128 минг доллар пора олган мансабдор шахсларга суд ҳукми ўқилгани, Фарғонада Кореядаги университетга имтиҳонсиз киритиб қўйишни ваъда қилиб, мактаб ўқувчиларидан жами 20 миллион сўм олган шахслар аниқлангани ҳамда Ангренда 3,5 минг доллар эвазига Жисмоний тарбия университетига киритиб қўймоқчи бўлган шахс ушлангани ҳақида хабар берилганди.
