Ернинг Шимолий яримшарида яшовчилар 10 июнь куни 2021 йил ҳисобида биринчи марта Қуёш тутилишига гувоҳ бўлди. Бу Ой ва Ер максимал масофада жойлашганда ёки шундай масофага яқинлашганда юз берадиган ҳалқали қуёш тутилиши эди. Ҳалқали тутилишда Ойнинг диаметри Қуёшникидан кичикроқ ва у Қуёшни тўлиқ тутилишдаги каби бутунлай қамраб ололмайди.
Мазкур Қуёш тутилиши Ўзбекистон аҳолиси учун ҳам кузатиш мумкин бўлган 2021 йилдаги биринчи тутилиш ҳисобланади. Ўзбекистонда тутилиш Тошкент вақти билан 16:58 да бошланиб, 17:53 да тугаган.
Бутун дунё бўйлаб эса Қуёш тутилиши Шимолий Америкада бошланиб, Узоқ Шарқда тугаган. Ҳодисани Канаданинг Онтарио провинциясида, Гренландияда ва Шимолий қутбда, шунингдек, Россия ҳудудига кирувчи Ёқутистон ва Чукоткада кўриш мумкин бўлган, Арктикада эса янада яхшироқ кўринган.
Осиёнинг шимолида, Европада ва АҚШда об-ҳаво имкон беришига қараб, қисман тутилишни кузатиш мумкин бўлган.
Қуёш тутилишини томоша қилмоқчи бўлганлар Қуёшга оддий кўз билан қараш мумкин эмаслигини ёдда тутиши лозим. Махсус кўзойнаклардан фойдаланиш ёки тутилиш проексиясини обскюр камера билан томоша қилиш яхшироқ (уни қўлда иккита картон қоғоздан ясаш мумкин). Қуёш тутилишини жонли равишда кўра олмаганлар учун бир нечта онлайн трансляциялар тақдим этилди.
Изоҳ (0)