2021-yilda Yerning turli burchaklarida yashovchi insonlar ikkita Quyosh va ikkita Oy tutilishini kuzatishi mumkin bo‘ladi, deb xabar beradi “Korrespondent.net”.
Foto: Pixabay
Ma’lum qilinishicha, 26-may kuni to‘liq Oy tutilishi kuzatiladi. Uni Sharqiy Osiyo, Avstraliya, Tinch okeani, Shimoliy va Janubiy Amerikadan turib kuzatish mumkin.
10-iyun kuni — halqasimon Quyosh tutilishi ro‘y beradi. Uning maksimal fazasini Kanada, Grenlandiya va Rossiya hududidan turib kuzatish mumkin. Qisman tutilish esa Shimoliy Amerika, Yevropa va Osiyo mamlakati aholisi uchun ko‘rinadi.
19-noyabr — qisman Oy tutilishi. Uni Shimoliy va Janubiy Amerika, Sharqiy Osiyo, Avstraliya, Tinch okeanidan turib kuzatish mumkin bo‘ladi.
4-dekabr — Antraktida hududida to‘liq Quyosh tutilishi. Qisman Janubiy Afrika va Atlantikaning janubiy qismlarida ham ko‘rinadi.
Ma’lumot uchun, Oy tutilishi — Oy sathiga Yer soyasi tushganda yuz beradigan hodisa. Bu hodisa Quyosh, Yer va Oyning bir-birlariga nisbatan egallagan vaziyatlariga bog‘liq. Oy Yerdagi kuzatuvchiga nisbatan Quyoshga qarama-qarshi tomonda (ya’ni to‘lin oy paytiga yaqin) bo‘lsa — Oy tutilishi, Quyosh tomonda (yangi oy paytiga yaqin) bo‘lsa, Quyosh tutilishi yuz beradi. Oy bilan Quyoshning ko‘rinma diametri taxminan barobar.
