Salvador bitkoinni dollar bilan bir qatorda qonuniy to‘lov vositasiga aylantiruvchi qonun loyihasini tayyorlamoqda. Bu bilan Salvador kriptavalyutani qonuniylashtirgan birinchi suveren davlat bo‘ladi, deb yozmoqda Inc.
Xabarga ko‘ra, davlat rahbari Nayib Bukele mamlakatning bitkoin texnologiyasidan foydalangan holda zamonaviy moliyaviy infratuzilmani yaratish bo‘yicha Strike bilan hamkorlik qilishini e’lon qildi.
“Keyingi hafta kongressga bitkoinni qonuniy to‘lov vositasiga aylantiruvchi qonun loyihasini yuboraman”, — dedi Nayib Bukele Mayamida bo‘lib o‘tgan Bitcoin 2021 konferensiyasida.
Salvadorda, asosan, naqd puldan foydalaniladi: taxminan, 70 foiz aholi bank hisobi yoki kartalariga ega emas. Pul o‘tkazmalari yalpi ichki mahsulotning (YaIM) 20 foizidan ko‘prog‘ini tashkil qiladi.
Eslatib o‘tamiz, elektromobil ishlab chiqaruvchi Tesla kompaniyasi 24-mart kuni o‘z mahsulotlari uchun bitkoinlar bilan to‘lash imkoniyatini qo‘shdi. May oyi o‘rtasida kompaniya bitkoinlarni to‘lov sifatida qabul qilishni to‘xtatdi. Bunga kriptovalyuta olish uchun qazib olinayotgan yonilg‘ilar miqdorining oshib borayotgani sabab bo‘lgani aytilmoqda.
Izoh (0)