Стресс, чарчоқ ва вазн ортиши сингари белгилар шунчаки кузатилмаслиги, организмда гормонлар ишлаб чиқарилиши билан муаммо борлигини англатиши мумкин.
Иштаҳанинг очилиши
Ҳамма вақт ейишни хоҳлаш ва одатдаги таом порцияси ҳам қоринни тўйдирмаса, қалқонсимон без гормони балансини текширтириб кўриш керак. Гипертиреозда қалқонсимон бездан катта миқдорда гормон ажралиши сабаб иштаҳа карнай бўлади. Қолаверса, доимий равишда очлик стресс гормони кортизол миқдорининг кўплигидан ҳам дарак бериши мумкин.
Соч тўкилиши
Аёлларда тестестерон миқдорининг кўпайиши эркаклардаги сингари соч тўкилишига олиб келиши мумкин. Аксарият ҳолларда бу тухумдонлар саратонидан дарак бериши, бу эса қандли диабет ва саратон касалликларига олиб келиши мумкин.
Вазнда ўзгариш
Ҳеч қандай сабабсиз вазн ўзгариши гормонлар балансида муаммо борлигидан дарак бериши мумкин. Семириб кетиш кортизол ёки тестестерон миқдорининг ошиб кетгани ёки қалқонсимон без фаолияти сусайганидан, озиб кетиш эса аксинча қалқонсимон без доимгидан ҳам фаол ишлаётганидан огоҳлантириши мумкин.
Кайфият ўзгариши
Асосан, менопауза учун хос бўлган мазкур симптом жинсий ёки қалқонсимон без гормонларида муаммо бўлганда ҳам кузатилиши мумкин.
Доимий равишда чарчоқни ҳис қилиш
Организмдаги исталган тизим, хусусан, гормонлар балансининг издан чиқиши энергия камайишига олиб келади. Агар ҳеч қандай сабабсиз ҳам чарчаб қоладиган бўлсангиз, дарҳол шифокорга мурожаат қилинг. Бу турли оқибатларга олиб келадиган хавфли белги бўлиши мумкин.
Уйқунинг меъёрда бўлмаслиги
Етарли даражада тиниқиб ухламаганда кортизол миқдори кўпаяди, кортизол миқдорининг кўпайиши эса меъёрда ухлашга халақит қилади. Қолаверса, уйқусизликка қалқонсимон без гормонининг ҳаддан ортиқ ажралиши сабаб бўлиши ҳам мумкин.
Хотира ва диққатнинг сусайиши
Қалқонсимон без суст ишласа ва кам гормон ажралса, когнитив қобилиятларга таъсир қилади. Диққат қилиш, хотира сусайиши ва информация қабул қилишда муаммо кузатилади. Бундай вақтда эндокринологга мурожаат қилиш керак.
Суяклар синиши
Организмга кирган Д витамини суякларни мустаҳкамлайдиган калситриол гормонига айланади. Кальций ва D витамини етишмаганда суяклар мўртлашади ва бу кальцийни назорат қиладиган гормонда муаммо борлигидан далолат беради.
Изоҳ (0)