Ўзбекистонда тадбиркорлик учун ерларни тўғридан-тўғри ва текинга бериш амалиётидан бутунлай воз кечилади. Бу ҳақда Президент Шавкат Мирзиёев раислигида 8 июнь, сешанба куни ўтказилган йиғилишда давлат раҳбари сўз юритди, дея хабар бермоқда «Дарё» мухбири.
«Шу пайтгача тадбиркорлар учун оғир муаммо бўлиб келган – ер участкаларини ажратиш масаласини ҳал қилиш бўйича фармонни имзоладим.
Энди тадбиркорлик учун ерларни тўғридан-тўғри ва текинга бериш амалиётидан бутунлай воз кечилади ва ерлар ҳамма учун бир хил ва ошкора, электрон аукцион орқали хусусий мулк қилиб сотилади ёки ижарага берилади. Туман ва шаҳар ҳокимларининг ер ажратиш ва уларни қайтариб олиш билан боғлиқ барча ваколатлари бекор қилинди.
Тарихий қарорлар қабул қиляпмиз. Ерни халққа бўлиб берамиз, 10 йилга ижарага берилади, кам таъминланган, ишсиз юрган одамлар олишади. Бир неча марта ҳосил олишади, ҳатто олган ғалласини ҳам ўзига қолдирамиз.
Энди вазифамиз фақат ер бериш эмас, ўша ердан қандай даромад топишни ўргатишимиз керак. Замон ўзгаряпти, биз замондан орқада қолмаслигимиз зарур. Етиштирилган маҳсулотлар сотиб олинадиган тизим яратилиши керак.
Бош прокурор Йўлдошев ва бош вазир ўринбосари Ғаниев бошчилигидаги кенгаш фармонни амалиётга жорий этиш, ижросини ташкил этиш ва назорати билан шахсан шуғулланади», — деди Президент.
Изоҳ (0)