Андижонда «Effect.uz» интернет нашри журналисти бир гуруҳ шахслар томонидан калтакланди. Нашрнинг ёзишича, Андижон шаҳар халқ депутатлари кенгаши котибияти мудири Раҳим Собировичнинг ўғли томонидан журналистларга қарата куч ишлатилган ва айни вақтда журналистларга босим ўтказилмоқда.
Бош прокуратура матбуот хизматининг маълум қилишича, Андижон вилояти прокуратураси томонидан мазкур ҳолат ўрганилмоқда. Воқеа иштирокчиларининг ҳаракатларига ҳуқуқий баҳо берилиши таъминланади.
«Xabar.uz» нашрининг ёзишича, Ўзбекистон Журналистлари ижодий уюшмаси ҳам ушбу ҳолатга ўз муносабатини билдирган: « ‘Журналистлик фаолиятини ҳимоя қилиш тўғрисида’ги, ‘Оммавий ахборот воситалари тўғрисида’ги қонунларда журналистнинг ўз фаолиятини амалга ошириш чоғида шахс дахлсизлиги кафолатланган, журналистнинг қонунда белгиланган ҳуқуқларини бузганлик, унинг ҳаёти, соғлиғи ва мол-мулкига таҳдид, зўравонлик ёки тажовуз қилганлик қонун ҳужжатларига мувофиқ жавобгарликка сабаб бўлиши белгиланган.
Ўзбекистон Журналистлари ижодий уюшмаси мазкур ҳолатни амалга оширган шахслар хатти-ҳаракатларига муносиб ҳуқуқий баҳо берилишига ва тегишли чоралар кўрилишига ишонади ҳамда Бош прокуратурадан ишни ўз назоратига олишини сўрайди», — дейилади уюшма баёнотида.
Шунингдек, ташкилот Андижон шаҳар ҳокимлигидан айни вазият юзасидан тезкор муносабат билдиришни ҳамда хизмат текшируви ўтказишни сўраган.
Эслатиб ўтамиз, 6 апрель куни «Effect.uz» ахборот агентлигининг 2 нафар мухбирига нисбатан Жиноят кодексининг 219 ва 236-моддалари билан сиртдан айб эълон қилиниб, суднинг ажрими билан қамоққа олиш эҳтиёт чораси қўлланилган ва уларга нисбатан қидирув эълон қилинганди.
Бунга 2021 йилнинг январь ойида «Effect.uz» нашрининг ходимлари жиноят ишлари бўйича Термиз туман суди раиси хизмат хонасига бостириб кириб, суд мажлисида иштирок этиш ва жараённи тасвирга олишни талаб қилгани тасвирланган видеоёзув тарқалгани сабаб бўлган. Видеоёзувда қайд этилган ҳолатга ҳуқуқий баҳо бериш мақсадида Судьялар олий кенгаши раиси томонидан бош прокурор номига тақдимнома киритилган.
Изоҳ (0)