Самарқандда йигит 50 ёшли танишини мих билан ўлдирганди. Ушбу жиноятни содир қилганликда айбланаётган фуқаро воқеа қандай бўлганини сўзлаб берди.
«Овқатланиб чиқиб кетаётгандим ёнимга келиб маҳкам ушлаб олди. Илтимос қилиб, ароқ олиб беришимни сўради. 100 грамм ароқ олиб берганимдан кейин, мени тинч қўй, деб чиқиб кетаётганимда орқамдан ушлаб олиб ҳақоратлашни бошлади. Ёшингиз катта, жиминг, мен кетишим керак, уйдагилар кутиб ўтирибди, деб бир неча бор огоҳлантирдим, бўлмади.
Онангни, синглингни деб жуда қаттиқ ҳақоратлашни бошлади. 10 мартадан зиёд огоҳлантирдим. Кейин қўлим билан жароҳат етказдим юз қисмига, кейин оёғим билан тепиб ташладим. Шунда ҳам ҳақоратлашдан тўхтамади.
Михни олиб қўрқитмоқчи эдим. Лекин чап кўкраги соҳасига тиқдим. 4 маротаба мих билан урдим. Ўша вақтда тез ёрдам келди ва шифохонага олиб кетди.
Мени ҳеч ким сўрамади. Кейин ўз хоҳишим билан тез ёрдам орқасидан шифохонага бордим», – дейди айбланувчи.
Фуқаро ўз қилмишидан пушаймон эканини таъкидлади.
«Тўрт нафар фарзандим бор. Бундай бўлишини умуман кутмагандим. Фарзандларимнинг юзига доғ туширишни хоҳламагандим. Тақдир тақозоси билан шундай бўлиб қолди. Лекин мен қочганим йўқ. Айбимга тўлиқ иқрорман. Синглимни ва онамни ҳақоратлагани жуда оғир ботди. Мен ҳам отам тенги одамни бу даражага етказишни хоҳламагандим», – дейди у.
Эслатиб ўтамиз, воқеа 5 июнь куни соат 18:30 ларда Ургут туманида юз берган. Шу туманда яшовчи 26 ёшли С.Б. маҳалла марказида жойлашган тўйхона олдида 50 ёшли таниши О.Ў.билан спиртли ичимлик истеъмол қилиб, маст ҳолатда ўзаро жанжаллашиб қолган.
Сўнг йигит шу атрофда жойлашган хўжалик моллари сотиш учун мўлжалланган савдо дўконига кириб, 15 сантиметр узунликдаги ўткир тиғли михни олиб чиқиб, Ў.О.нинг ўнг кўкрак қисмига бир маротаба санчиб, у ерга йиқилганидан сўнг оёқ ва қўллари билан бош соҳасига зарбалар бериб, унга кўплаб оғир тан жароҳатлари етказган.
Оқибатда Ў.О. Ургут туман тиббиёт бирлашмасининг жонлантириш бўлимида вафот этган. Марҳумнинг ўлим сабабларини аниқлаш мақсадида суд-тиббий экспертизаси тайинланган.
Ҳолат юзасидан 5 июнда туман прокуратураси томонидан С.Б.га нисбатан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилган.
Бундан аввал шу воқеа акс этган видеони тарқатган шахс 7 суткага қамалгани ҳақида хабар берилганди.
Изоҳ (0)