Ижтимоий тармоқларда Фарғона вилоятининг Қўштепа тумани ИИБда талончиликда гумонланган ёш йигит томирини кесгани ҳақида хабарлар тарқалди, деб ёзмоқда «Xabar.uz». Айтилишича, йигит ички ишлар бўлими ходимларининг хатти-ҳаракатларига норозилик сифатида шундай йўл тутишга мажбур бўлган. Оиланинг ёлғиз боқувчиси бўлган гумондор илгари ҳам баҳсли айблов билан бир неча ой «ўтирган».
Фарғона вилоят прокуратурасининг маълум қилишича, дастлабки маълумотга кўра, содир этилган талончилик жинояти бўйича ушланган М.И. 2 июнь куни тергов ҳаракатлари ўтказиш учун туман ИИБга олиб келиниб, қамоқ эҳтиёт чораси қўллаш масаласини кўриб чиқиш учун судга олиб кетилаётганида қўл билак соҳасини кесиб, ўзига жароҳат етказган.
Ҳозирда ҳолат юзасидан Қўштепа туман прокуратураси томонидан терговга қадар текширув ҳаракатлари олиб борилмоқда.
Эслатиб ўтамиз, апрель ойининг бошларида Фарғонада ниқоб тақмаган 20 ёшли йигитнинг ўлиги ИИБдан чиққани ҳақида миш-миш тарқалганди. Аслида эса у акасини кўргани кетаётганида вафот этган бўлиб чиққанди.