“Хоразм лазги рақси” санъатининг асрий анъаналарини сақлаш ва ривожлантириш, рақс санъати орқали халқлар ўртасидаги дўстлик, биродарлик ришталарини мустаҳкамлаш мақсадида 25—30 апрель кунлари Хоразм вилоятининг Хива шаҳрида II “Лазги” халқаро рақс фестивали бўлиб ўтмоқда. Бу ҳақда “Дарё” мухбири хабар берди.
2024 йилда иккинчи маротаба ўтказилган II “Лазги” халқаро рақс фестивалида дунёнинг 33 давлатидан 200 дан зиёд истеъдодли раққосалар, профессионал рақс жамоалари, рақс санъати усталари, мусиқашунос ва санъацҳунос олимлар, таниқли санъаткорлар, етук мутахассислар, фахрий меҳмонлар иштирок этмоқда.
Ўзбекистон номидан иштирок этиш учун Ўзбекистон бўйлаб 2024 йилнинг I чораги давомида Маданият вазирлиги томонидан “Лазги” халқаро рақс фестивали кўрик-танлови ўтказилиб, унда республика босқичи ғолиблари (3 та (50 нафар атрофида) ашула ва рақс ансамбли ва 3 нафар яккахон ижрочилар) Халқаро фестивалда Ўзбекистон номидан иштирок этди.
Фестивалда танлов иштирокчилари чиқишларини баҳолаб бориш бўйича халқаро ҳакамлар ҳайъати таркиби шакллантирилган бўлиб, унда 5 та (Франция, Миср, Бразилия, Корея, Қозоғистон) хорижий давлатдан ҳамда Ўзбекистон (2 нафар) дан ҳакамлик қилмоқда.
Шунингдек, Халқаро туркий маданият ташкилоти – TURKSOY, Тожикистон Республикаси, Қозоғистон Республикаси, Япония, Бразилия, Франция, Миср Араб Республикаси вакиллари фестивалда Фахрий меҳмон сифатида иштирок этяпти.
27 апрель куни хорижий ва маҳаллий рақс санъати усталари, мусиқашунос ва санъацҳунос олимлар, таниқли санъаткорлар ва фахрий меҳмонлар иштирокида “Хоразм “Лазги” рақси: Маданий дипломатияни ривожлантиришнинг илмий – назарий, маънавий – маърифий тамойиллари” мавзусида халқаро илмий-амалий конференцияси ҳамда шу куни “Ичан қалъа” мажмуасида фестивалнинг тантанали очилиш маросими бўлиб ўтди.
II “Лазги” халқаро рақс фестивали доирасида хорижлик мутахассислар иштирокида давра суҳбатлари, ижодий учрашув ва маҳорат дарслари, концерт томошалари ва “Хоразм лазги рақси” санъатига оид кўргазмалар ташкил этилмоқда.
Изоҳ (0)