Ўзбекистонда 2025 йилга қадар давлат корхоналари сони 75 фоизга қисқартирилади. Бу ҳақда 27 май куни Давлат активларини бошқариш агентлиги директори Акмал Ортиқовга таяниб, «Gazeta.uz» хабар берди.
Давлат активларини бошқариш агентлиги раҳбари ўз чиқиши давомида бугунги кунда «деярли ҳар бир давлат органи ёки маҳаллий ҳокимият органи давлат корхонаси таъсисчиси эканини» таъкидлаб ўтган. Унинг сўзларига кўра, Ўзбекистонда 2541 та давлат корхоналари мавжуд, уларнинг деярли ярми (1210 таси) унитар корхона сифатида фаолият кўрсатади.
«Давлат иштирокидаги корхоналарнинг катта қисми самарасиз. Бу давлат яхши менежер эмаслигини яна бир бор тасдиқлайди», — дейди директор. Шунингдек, у давлатнинг иқтисодиётдаги аралашуви ҳамон олдингидек юқори ва бу кўрсаткич 50 фоиз атрофида эканини қўшимча қилган. Унинг таъкидлашича, Жанубий Кореяда мазкур кўрсаткич 22 фоизни, Германияда 18 фоизни, АҚШда 11 фоизни ва Японияда 5 фоизни ташкил этади.
Акмал Ортиқов март охирида тасдиқланган 2021—2025 йилларда давлат иштирокидаги корхоналарни бошқариш ва ислоҳ қилиш стратегиясини эслаб ўтган. Ҳужжатда келтирилган асосий вазифалардан ташқари, Давлат активларини бошқариш агентлиги директори давлат корхоналарининг инвестиция лойиҳаларини молиялаштириш учун эксклюзив имтиёзлар, преференция ва давлат кафолатларини бериш амалиётини бекор қилинишини айтиб ўтган.
Унинг қўшимча қилишича, 2025 йилга бориб давлат корхоналарининг ижро кенгашларидаги мустақил аъзолар сони 30 фоизга етказилади. Ижро органлари лавозимига номзодлар, шунингдек, танлов асосида уч йиллик муддатга тайинланади.
Аввалроқ Давлат активларини бошқариш агентлигининг қатор ҳудудий бошқарма раҳбарлари фаолиятидаги камчиликлар туфайли ишдан олингани тўғрисида хабар берилганди.
Изоҳ (0)