Тошкент ҳокимлиги 31 май куни Яккасарой ва Сергели туманларини бирлаштирувчи йўл ўтказгичнинг қурилиш жараёни ва лойиҳа қийматининг нима сабабдан икки баробар ошгани тўғрисида маълумот берди.
Сергели туманидаги Чўпонота, Кичик ҳалқа автомобиль йўли, Тошкент ҳалқа автомобиль йўли ва Қипчоқ кўчалари ўртасида жойлашган олти полосали автомобиль йўли ҳамда учта йўл ўтказгични қуриш лойиҳасининг қиймати ошгани тўғрисида олдинроқ хабар берилганди. 2021 йил 19 май куни буюртмачи ва Grand Road Tashkent ўртасида қўшимча битим имзоланган бўлиб, унинг доирасида амалга ошириладиган ишлар қиймати 280 миллиард сўмдан 518,3 миллиард сўмга қадар оширилган.
Бош лойиҳачи сифатида танланган Allegro Develop Plast компанияси техник директори Тошкент шаҳар ҳокимлиги матбуот хизматига берган интервьюсида лойиҳанинг бошланғич нархи «космик суратга олишлар, маҳаллий ҳудуд, узунлик, кенглик ва дастлабки кўринишдан келиб чиқиб» белгиланган, деб ёзади «Gazeta.uz»
«Биз ушбу нархни тахминий олганмиз. Мазкур қиймат асосида қурилиш ишларини бошлаганмиз. Бироқ тегишли қарорлар, йўлни тез ва сифатли қуриш борасида объектни лойиҳалаштириш учун Туркиянинг Kalyon Ulastirma компаниясини жалб этиш ғояси пайдо бўлди… Kalyon келгандан сўнг, трассани яхшилаб ўрганишимизга, яъни топографик суратга олиш, геологик тадқиқотлар, диагностик ишларни амалга оширишга тўғри келди, Kalyon Ulastirma бошқа жозибадор, сифатли ва қулай таклифни илгари сурди», — дейди у.
Унинг сўзларига кўра, якунда лойиҳа қайта ишланган — бошида унда кўприкдан Кичик ҳалқа йўлига тушиш йўллари фақат Чўпонота кўчаси тарафидан бўлган ва бу ҳайдовчилар учун ноқулайликлар туғдирарди. Лойиҳага қўшимча тушиш йўллари қўшилган.
Бундан ташқари, кўприк «100 фоизли» монолит қоплама технологияси асосида қурилмоқда. Авваллари кўприклар тўсинлар билан ёпилган. Қалинлиги 1 метр келадиган арматурали монолит қоплама трослар билан тортилади, бу эса конструкцияга катта мустаҳкамлик ва барқарорлик беради.
Темир йўл устидан ўтган қисм халқаро стандартларга мувофиқ 5,5 метр баландликда қурилаётган эди, лекин темир йўлчилар кўприкни яна икки метрга кўтаришни талаб қилган, шу сабабли ўз-ўзида кўприкнинг қия қисми ҳам узайган.
«Кўприкни ўтказишда муҳандислик коммуникацияларини ўзгартириш бўйича катта ишлар амалга оширилди: юқори кучланишли электр тармоғи ер остига олинди, Салар оқими ўзгартирилди, ҳозирда бир қисми йўл ҳудудига тушган магистрал газ қувури кўчирилмоқда, ҳалқа йўли яқинида тозалаш иншоотлари бўлган эди, уларни демонтаж қилишга тўғри келди», — дейилади хабарда.
Шунингдек, бошқа харажатлар ҳам бўлган: масалан, йил давомида қурилиш материалларининг (арматура ва бетон) нархи икки баробар ошган.
«Айтиб ўтилган фактлар қурилишнинг бирламчи қиймати нима учун 236 миллиард сўмга ошганини тушунтиради. Шунингдек, лойиҳада қурилиш бўладиган барча манзилларда бузиш ишлари бўлмаслигига алоҳида эътибор қаратилди. Бу каби кенг кўламли ишларнинг барчаси иншоот қийматига киритилди», — дейилади ҳокимлик матбуот хизмати хабарида.
Ҳокимлик томонидан эълон қилинган ҳисоб-китобларга кўра, Чўпонота йўл ўтказгичининг қурилиш қиймати 133,5 миллиард сўмни ташкил этган бўлса, ҳозирда унинг нархи 52,9 миллиард сўмга ортган ва 186,4 миллиард сўмга етган. Тошкент ҳалқа автомобиль йўлидаги йўл ўтказгич нархи 30,4 миллиард сўмдан 89,4 миллиард сўмга (+59 миллиард), Қипчоқ йўл ўтказгичи — 2 миллиард сўмдан 20,6 миллиард сўмга (+18,6 миллиард) етган. Йўлни қуриш ишлари 115,7 миллиард сўмдан 172 миллиард сўмга етган (+56,3 миллиард).
Кўприкнинг умумий узунлиги 6,6 километрни ташкил этади.
Якунда ўз ичига 51,8 миллиард сўмлик қурилиш зонасидан коммуникацияларни олиб ташлаш киритилган лойиҳанинг умумий қиймати 236 миллиард сўмга ошган — 281,7 миллиарддан 518,3 миллиард сўмга қадар.
Йўл ўтказгичнинг Чўпонота кўчасидан Ҳалқа йўлигача бўлган биринчи қисми сентябрда, Қипчоқ кўчасигача бўлган иккинчи қисми 2021 йилнинг охиригача ишга тушиши кутилмоқда. Янги йўл ўтказгич шаҳар марказигача бўлган йўлни қисқартиришга ва Ўзгариш кўчасидаги доимий тирбандликларни камайтиришга имкон беради.
Изоҳ (0)