NASA Венерага иккита миссия тайёрламоқда

NASA 2028—2030 йилларда Венера сайёрасини тадқиқ этишга иккита — DAVINCI+ ва VERITAS миссияларини юборади. Бу ҳақда Америка Миллий космик агентлиги матбуот хизматига таяниб, «Korrespondent.net» хабар берди.

Таъкидланишича, Ернинг яқин қўшниси бўлган сайёрага парвозлар «Ерга нисбатан кўплаб ўхшашлиги бўлган Венера қандай қилиб дўзахга айланганини»ни тушуниш учун амалга оширилади.

DAVINCI+ доирасида олимлар Венера атмосфераси таркибини, у қандай қилиб шакллангани ва ривожланганини ўрганишни, шунингдек, сайёрада қачонлардир океан бўлган-бўлмаганини аниқлаш режалаштирилган.

VERITAS миссияси доирасида NASA ходимлари Венера юзасининг харитасини яратиш ниятида. Бу орқали улар сайёранинг геологик тарихини тадқиқ этади, шунингдек, Венера нима сабабдан Ер каби ривожланмаганини аниқлайди.

Маълум қилинишича, сўнгги 50 йил ичида Венерага амалга ошириладиган илк парвозларга тайёргалик учун агентлик томонидан миллиард долларга яқин маблағ ажратилади.

Аввалроқ NASA биринчи космик музлаткични яратгани, Марсдаги NASA вертолёти тўртинчи парвозини амалга ошира олмагани, космик агентлик қизил сайёрада пайдо бўлган «камалак» юзасидан изоҳ бергани тўғрисида хабар берилганди.