IT Park 27 та компаниянинг резидент мақомини бекор қилди

IT Park дирекцияси ўз мажбуриятларини бажармаган 27 та компаниянинг мақомини бекор қилди, деб хабар беради Texnopark матбуот хизмати.

Резидентлик мақоми бекор қилинган компанияларнинг аксарияти Тошкент, Хоразм, Наманган ва Қашқадарё вилоятларида жойлашган. Улар орасида — «Осон Аптека», Hoop Club, Invan Soft, Silosofiya IT, Imenu, Sochool-Service ва бошқалар бор.

Дирекциянинг эслатишича, IT Park резидентларининг вазифалари низомнинг фаолият турларига асосланган бизнес-режада кўрсатилган фаолият турларини амалга ошириш, IT Park дирекциясига ҳар чоракда фаолияти тўғрисидаги маълумотларни тақдим этиш, молиявий-хўжалик фаолиятининг йиллик аудитини ўтказиш ва аудиторлик хулосасининг бир нусхасини IT Park дирекциясига юбориш, резидентнинг IT Park дирекцияси билан ишлаш шартлари тўғрисидаги шартномадан келиб чиқадиган мажбуриятларни бажаришдан иборат.

Вазирлар Маҳкамасининг 2019 йил 15 июлдаги 589-сонли қарорига мувофиқ, низом талабларини бузган юридик шахслар Texnopark резиденти мақомидан маҳрум қилинади, солиқ имтиёзлари эса белгиланган тартибда Ўзбекистон Давлат бюджетига тўлаш мажбуриятларини тиклаш билан бекор қилинади.

Эслатиб ўтамиз, IT Park Президентнинг 2018 йилда Ҳиндистонга давлат ташрифи чоғида эришилган келишув асосида Ўзбекистон Ахборот технологиялари ва коммуникацияларини ривожлантириш вазирлиги билан Ҳиндистоннинг Электроника ва ахборот технологиялари вазирлиги қошидаги «Дастурий технологиялар парклари жамияти» ҳамкорлигида ташкил этилган. Texnopark’да мутахассислар учун барча қулайликлар яратилган, истиқболли стартап-лойиҳаларни қўллаб-қувватлаш бўйича инкубация ва акселерация дастурлари ташкил этилган