Ўзбекистон товар-хом ашё биржасининг барча савдо платформаларида 24—30 май кунлари 1 895,4 миллиард сўмлик товарлар сотилган бўлиб, бу аввалги ҳафтага нисбатан 3,1 фоизга кўп. Бунда сотувларнинг 87,7 фоиз – биржа савдолари; 1,5 фоиз – кўргазма-ярмарка савдолари; 10,5 фоиз – электрон давлат харидлари ва 0,3 фоиз – авторақамларнинг онлайн-аукционига тўғри келди.
Пахта ёғи
Кўриб чиқилаётган муддатда ( 24—30 май) биржа савдоларида 1 629 тонна пахта ёғи сотилди. Ўтказилган савдоларда ҳар куни ўртача 163 та харидор иштирок этди.
Кўриб чиқилаётган даврда барча навли пахта ёғининг кунлик ўртача нархлари пасайиш ҳолатларини намоён этди. Хусусан, ўтган душанба–пайшанба кунлари ўртача нархлар маҳсулотнинг бир тоннаси учун 16 140 100 сўмдан 15 586 000 минг сўмгача, яъни 3,4 фоиз га пасайди. Бироқ ҳафтанинг сўнгги савдо кунида котировка бироз кўтарилиб 16 653 900 сўмни ташкил қилди.
Ҳафта якунларига кўра 1-навли пахта ёғининг ҳафталик котировкаси маҳсулотни бир тоннаси учун 17 718,6 минг сўмни ташкил этди.
Эслатиб ўтамиз, бундан аввалги муддатда пахта ёғи нархи 12,4 фоизга пасайганди.
Бензин
Ўтган ҳафтада биржа савдоларига 23 737 тонна Аи-80 маркали автомобиль бензини қўйилди ва улардан 16 729,1 тоннаси, яъни 70,5 фоиз сотилди. Ўтказилган савдоларда ҳар куни ўртача 45 харидор иштирок этди.
Кўриб чиқилаётган даврда Аи-80 маркали автомобиль бензинининг ўртача кунлик нархи маҳсулотнинг бир тоннаси учун 6 673 400 сўмдан 6 644 100 сўмгача пасайди.
Кўриб чиқилаётган даврда Аи-80 русумли автомобиль бензинининг ўртача ҳафталик котировкаси 6 663 500 сўмни, Аи-91 – 7 702 800 минг сўмни ташкил этди.
Маълумот учун, турли манбаларда келтиришича автомобиль бензинининг бир тоннаси ўртача 1293–1370 литрни ташкил қилади.
Бундан аввал Монополияга қарши курашиш қўмитаси ёғ нархи ошиши юзасидан 34 та кластерга иш қўзғатгани, Ўзбекистон 2021 йилда 200 миллион литрдан ортиқ бензин импорт қилгани, Қашқадарёда қўлбола ёғ ишлаб чиқараётган фуқаро аниқлангани ҳақида хабар берилган эди.
Изоҳ (0)