Европада «бахтини» топа олмаган мексикалик «нўхат болакай»

Мексикалик машҳур ҳужумчи Хавьер Эрнандес 1988 йил 1 июнда таваллуд топган. 33 ёшини нишонлаётган Чичаритонинг фаолиятидаги баланд-пастликлар ҳақидаги ҳикояни «Дарё» ўзбек тилида тақдим этади.

Хавьер футболчилар оиласида вояга етган. Унинг бобоси Томас Балкасар  маҳаллий «Гвадалахара» жамоасида 10 йил фаолият олиб борган, 1954 йилда Мексика терма жамоаси билан Жаҳон Чемпионатида қатнашган. Отаси Хавьер Эрнандес Гутьеррес эса 1986 йилги мундиалда иштирок этган. У «Чичаро» (нўхат) тахаллуси билан машҳур эди. Хавьер эса «Чичарито» (кичик нўхат) номини олди. Атрофида футбол муҳити ҳукм сурган Чичарито 9 ёшида, яъни 1997 йилда «Чивас Гвадалахара» жамоаси билан профессионал шартнома имзолади. 2006 йилда катта футболда ўз дебютини нишонлади. «Чивас»да 4 мавсумни ўтказиб (барча мусобақаларда 80 та ўйин, 29 гол), Мексика чемпионлигини қўлга киритган. Фаолияти аввалида Хавьер жуда кўп қийинчиликларга дуч келган эди.

«Уч йил олдин мени нотўғри йўл танладимми деган савол қийнарди. Менга жуда кам ўйин амалиёти бериларди. Асосан захирадан майдонга тушардим. Бошқа ёш футболчиларга берилаётган имкониятларни алам билан кузатардим. Шунда мен футболдан кетиш ҳақида ўйлаб қолдим. Ота-онам, бобом ва бувим, синглим билан бу вазиятни муҳокама қилардик. Улар менга нима қилиш кераклигини тушунтиришди. Уларнинг ёрдами билан мен бахтли эканимни, футбол ўйнашда давом этишим кераклигини тушунгандим. Бу менга катта сабоқ бўлди», — дея эслайди Эрнандес.

2009 йилнинг ёзида Эрнандес «Манчестер Юнайтед» назарига тушади. Орадан бир йил ўтиб, «Чивас» ва «Манчестер Юнайтед» трансфер борасида келишувга эришади. Англияликлар футболчи учун 7,5 миллион евро тўлайдиган бўлди.

Сер Алекс Фергюсон Хавьерни Оле-Гуннар Сульшерга қиёслайди. Унинг наздида жамоага яна бир «болакай қиёфасидаги қотил» келган эди.

Манчестердаги дастлабки 4 мавсумида Чичарито футболдан роҳатланди. Лекин Фергюсон мураббийлик фаолиятига якун ясаганидан сўнг (2013 йил) унинг ишлари юришмади. Хавьер Дэвид Мойеснинг режаларига кирмаган эди. 2014/15 йилги мавсум аввалида «Манчестер Юнайтед» сафида атиги 2 ўйинда майдонга тушган футболчи 2014 йил 1 сентябридан эътиборан «Реал Мадрид»га ижарага бериб юборилди. Лекин «қаймоқранглилар» сафида ҳам Чичарито ўз иқтидорини намойиш эта олмади. Карло Анчелотти унга жуда кам ишонч билдирарди. Чемпионлар Лигасининг чорак финалида «Атлетико Мадрид»га киритган ягона голи мадридликларни ярим финалга олиб чиқди. Шундай бўлса ҳам Хавьер жамоада қолмади. Унинг «Реал Мадрид» сафидаги натижалари эса қуйидагича бўлди: 33 ўйинда майдонга тушди, 9 та гол урди ва 2014 йилда Клублар ўртасидаги Жаҳон чемпионати ғолиблигини қўлга киритди.

«Чемпионлар Лигасининг чорак финали олдидан Бэйл ва Бензема жароҳат олди. Карло Анчелотти мана шу мен учун имконият эканлигини, у менга ишонишини айтди. Криштиану Роналдунинг ёрдами билан «Атлетико»га гол урдим ва «Реал» ярим финалга йўл олди. Лекин Мадридда қола олмадим», — деганди Чичарито.

Испаниядаги сафаридан сўнг Англияга қайтган Чичарито энди кўпроқ ўйин амалиётига умид қилган эди. Аммо «қизил иблислар»нинг янги мураббийи Луи ван Гал очиқчасига унга ишонч билдирмаслигини айтди. Натижада футболчи 2015 йилнинг ёзида Германиянинг «Байер» жамоасига ўтишга мажбур бўлди.

«Мен уйимга қайтгандим. Манчестерда ўтказган 4 мавсумимдан сўнг, у ер менинг иккинчи уйимга айланиб қолган эди. Англияга ўйинга чанқоқ ҳолда қайтгандим. Лекин Луи ван Галнинг шарофати билан мен «Байер»га ўтдим. Мураббий юз имкониятдан фақат биттасида мени майдонга туширишини айтди. Шунда мен кетиш кераклигини тушундим», — эслайди Хавьер.

Хавьернинг Германиядаги илк мавсуми муваффақиятли ўтди. 40 ўйинда 26 та гол киритган Чичарито нафақат Бундеслиганинг рамзий жамоасига киритилди, балки «Бундеслига рамзи» мукофотини ҳам қўлга киритди. «Байер»даги иккинчи мавсуми эса кўнгилдагидек кечмади. 36 ўйинда 13 та гол киритишга муваффақ бўлган Хавьер Эрнандесга Англиянинг «Вест Ҳэм» жамоаси қизиқиш билдирди. Инглиз жамоаси футболчи учун 18 миллион евро тўлади.

Англияга бу сафарги қайтиш ҳам омадсиз бўлди. Чичарито энди эски формасини тиклай олмади. 2019/20 йилги мавсумда Мануэль Пеллегрини унга мунтазам равишда асосий таркибда майдонга туширди. Лекин Эрнандес ишончни оқлай олмади.

Мексикалик футболчи «Севилья»нинг қизиқиши доирасига тушибгина қолмай, андалусияликлар сафига ҳам бориб қўшилди. Испания жамоасидаги дебют голини Европа Лигаси гуруҳ босқичининг 1-турида «Қорабоғ» дарвозасига урди. «Севилья»да ҳам футболчи ёдда қоларли ҳаракатларни амалга оширмади. Натижада, 2020 йилнинг январь ойида океан ортига йўл олди. Хавьернинг янги жамоаси «Лос-Анжелес Гэлакси» эди.

Америкага кетиши олдидан у ота-онаси билан телефонда суҳбатлашди. Европада энди тўп сура олмаслиги, Америка жамоасига ўтиши аста-секин фаолиятининг сўнгги паллалари яқинлашаётганини билдиришини айтиб, кўз ёшини тия олмади:

 «Хоҳлаймизми ёки йўқ, биз Европа орзусига якун ясаяпмиз. Бу оддий ҳол, мен сизга қўнғироқ қилишни истадим. Жуда оғир, лекин буни енгиб ўтаман, ахир мен бахтлиман — мана мен нимани назарда тутяпман. Гап энди менинг уддалай олмаслигимда эмас… Мен бу ажойиб тажрибага «кўришгунча» деб қоламан. Мен энди бу ерда бўлмайман, аммо бир қисмим қолади. Албатта, келажакда нима бўлишини олдиндан билиб бўлмайди. Энди орзулар бошқача. Қийин бўлади, лекин энди сизларга яқин бўламан, тез-тез сизларни кўришга бориб тураман», — деганди Эрнандес.

Чичарито «Лос-Анжелес Гелакси» сафида 2020 йилда 12 ўйинда майдонга тушиб, 2 та гол урган бўлса, 2021 йилда 6 ўйинда 7 та голни ўз ҳисобига ёздириб қўйди.

Терма жамоада эса у алмаштириб бўлмас футболчига айланган. Хавьер Эрнандес 2010, 2014 ва 2018 йилги мундиалларда қатнашиб, отаси ва бобосининг анъанасини давом эттирди. Қайд этиш жоиз, бир оиланинг уч авлоди мундиалларда қатнашиши бунга қадар содир бўлмаганди. Чичарито Мексика терма жамоаси билан КОНКАКАФ кубоги ва КОНКАКАФ олтин кубогини қўлга киритган.