Ўзбекистонда эндиликда ҳайвонларга нисбатан шафқатсиз муносабатда бўлганлик учун нафақат жарима белгиланиши, балки озодликдан маҳрум этиш жазоси тайинланиши ҳам мумкин. Олий Мажлис Сенати 28—29 май кунлари бўлиб ўтган навбатдаги ялпи мажлисида бу борадаги қонунчиликка тегишли ўзгартиришларни киритишни маъқуллади, деб хабар беради «Gazeta.uz».
Маъмурий жавобгарлик тўғрисидаги кодекснинг 111-моддаси (ҳайвонларга нисбатан шафқатсиз муносабатда бўлиш) бўйича белгиланадиган жазолар кучайтирилмоқда:
«Ҳайвонларга нисбатан шафқатсиз муносабатда бўлиш уларнинг ўлимига ёхуд майиб бўлишига олиб келса, худди шунингдек ҳайвонларни қийнаш — базавий ҳисоблаш миқдорининг 3 бараваридан (735 минг сўм) 5 бараваригача (1,225 миллион сўм) жарима белгиланишига сабаб бўлади.
Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса ёхуд ушбу модданинг биринчи қисмида назарда тутилган ҳуқуқбузарлик вояга етмаган шахс ҳозирлигида содир этилган бўлса — БҲМнинг 5 бараваридан 10 бараваригача жарима ёки 15 суткагача маъмурий қамоқ жазоси белгиланишига сабаб бўлади».
Сенат томонидан маъқулланган ўзгартиришларга кўра, Жиноят кодексига янги 202-1 моддаси (ҳайвонларга нисбатан шафқатсиз муносабатда бўлиш) киритилмоқда:
«Ҳайвонларга нисбатан шафқатсиз, яъни уларни қийнаш ёки ғаразли ёки бошқа сабабларга кўра жароҳатлаш орқали уларнинг ўлими ёки майиб бўлишига олиб келиш ҳолати худди шу каби ҳаракат учун маъмурий жавобгарлик белгиланганидан кейин ҳам содир этилган тақдирда — БҲМнинг 25 бараваридан (6,125 миллион сўм) 50 бараварига (12,25 миллион сўм) қадар жарима ёки 240 соатгача мажбурий жамоатчилик ёки 1 йилгача ахлоқ тузатиш ишларига жалб этиш ёки 6 ойгача озодликни чеклаш ёхуд 6 ойгача озодликдан маҳрум этиш жазоси тайинланишига сабаб бўлади».
Мавзуга доир:
Изоҳ (0)