Шерзод Шерматов: «Ёзда ойига 15-20 млн сўмдан ортиқ даромад топаётган юқори синф ўқувчилари борлигини кўрдим»
Халқ таълими вазири Шерзод Шерматов Самарқанд вилоятининг Ургут туманида ёзда қўшимча даромад топиб, оиласига ёрдам бераётган юқори синф ўқувчилари билан суҳбатлашиб, уларнинг ишлари билан танишди.
«Уларнинг орасида нафақат ўзи меҳнат қилиб 5-10 миллион сўм ойига топаётганлари, балки ўзидан ташқари қўшимча 30-40 ишчиларни ҳам ойлик билан таъминлаб, ўзи ойига 15-20 миллион сўмдан ортиқ даромад топаётган тадбиркорлари ҳам бор эканлигини кўриб, жуда хурсанд бўлдим.
Ёзда вақтларини беҳуда ўтказмай, ўз ҳалол меҳнати билан оила рўзғорига кўмаклашаётган юқори синф ўқувчиларидан тенгдошлари ўрнак олиши зарур», — деб ёзган вазир ўзининг Telegram’даги саҳифасида.
Шерзод Шерматовнинг айтишича, мактаблар рейтинги аввалги йилларда фақат ўқувчиларнинг ОТМга кириши билан белгилангани сабабли Ургут тумани кўрсаткичи анча паст бўлган. Эндиликда эса мактаб фаолияти натижалари нафақат битирувчиларининг ОТМга киргани, балки умуман, битирганидан кейинги бандлиги билан баҳоланадиган бўлди.
Вазирнинг таъкидлашича, шуни инобатга олиб, мактаблар ОТМга қизиқиши йўқ бўлган ўқувчиларни меҳнат бозорига тўғри йўналтириш бўйича сектор раҳбарлари билан ҳамкорликда ҳаракат қилиши керак.
Эслатиб ўтамиз, Шерзод Шерматов 2020 йилда мактабни битираётган ёшларга йўллаган мурожаатида инсон муваффақиятининг 90 фоизи унинг айнан ўзига боғлиқлигини таъкидлаганди.
«Инсон муваффақиятининг кўпи билан 10 фоизи омадга ва ташқи омилларга, қолган 90 фоизи эса айнан ўзига боғлиқ эканлиги учун юқори мақсадлар қўйиб, ўз кучингизга ишониб, тинмай ҳаракат қилишингиз зарур! Энг асосийси, вақтингизни беҳуда ўтказманг! Вақт ҳаётингиздаги энг қимматбаҳо ресурс ҳисобланади. Вақтингизни доим ўзингиз, оилангиз ва жамиятга фойда келтириш учун сарф қилинг ҳамда мамлакатимиз нуфузини оширишга ўз ҳиссангизни қўшинг!», — деган эди у.
Халқ таълими вазири интернет орқали ҳам қонуний пул топиш мумкинлигини айтганди.
