Ўзбекистондаги мусиқа мактабларида ойлик жуда паст. Шу боис мазкур муассасаларнинг аксарият ходимлари ўрта махсус маълумотли кадрлардан иборат. Бу ҳақда Маданият вазири Озодбек Назарбеков 24 май, душанба куни «Тошкент 5 ташаббус ҳаракати» ёшлар фестивали доирасида ўтказилган учрашувда сўз юритди, дея хабар бермоқда «Дарё» мухбири.
«Олий маълумотли кадрларнинг санъат соҳасига етишмаётгани бор гап ва бу жуда катта муаммоларимиздан бири. Маданият, санъат олийгоҳларини битирган педагогларнинг олдида иккита йўл туради: халқ таълими тизимидаги мактабда мусиқадан дарс бериш ва мусиқа мактабларида ишлаш. Лекин уларнинг ойликларини солиштирсангиз, катта фарқ бор.
Масъул юқори ташкилотлар мусиқа мактабларини мактаб ўрнида кўришмаяпти ва уларни худди тўгаракдек қабул қилишмоқда. Шунинг учун мусиқа мактабларида ойлик жуда паст. Мусиқа бўйича мутахассис тайёрламайдиган халқ таълими тизимидаги мактабларда эса ойлик юқори. Шу сабабдан олий маълумотли кадрлар мактабларга кетиб қолишяпти. Мусиқа мактабларини куни ўрта махсус маълумотли кадрларга қолиб кетмоқда.
Ҳозир олдимизда турган асосий масала ҳам шу: мусиқа мактаблари ўқитувчилари ва халқ таълими тизимидаги мактаблар ўқитувчиларининг ойликларини мувофиқлаштириш. Фақат шундагина кадрлар етишмовчилиги муаммосини ҳал қилиш мумкин. Бошқача йўл билан кадрларни мусиқа мактабларида ушлаб қолиб бўлмайди», — деди Назарбеков.
Мавзуга доир:
- Озодбек Назарбеков «Мендирман Жалолиддин»га билдирилган танқидлар ва фильмнинг навбатдаги мавсуми қачон суратга олинишига изоҳ берди
- Озодбек Назарбеков актёр Алишер Узоқовнинг Президентга қилган мурожаатидаги масала бўйича муносабат билдирди
- «Амир Темурнинг ўзи қириб юборарди». Озодбек Назарбеков дин сабаб санъатни тарк этаётган ҳамкасбларининг мусиқани ҳаром деяётганига муносабат билдирди
Изоҳ (0)