O‘zbekistondagi musiqa maktablarida oylik juda past. Shu bois mazkur muassasalarning aksariyat xodimlari o‘rta maxsus ma’lumotli kadrlardan iborat. Bu haqda Madaniyat vaziri Ozodbek Nazarbekov 24-may, dushanba kuni “Toshkent 5 tashabbus harakati” yoshlar festivali doirasida o‘tkazilgan uchrashuvda so‘z yuritdi, deya xabar bermoqda “Daryo” muxbiri.
“Oliy ma’lumotli kadrlarning san’at sohasiga yetishmayotgani bor gap va bu juda katta muammolarimizdan biri. Madaniyat, san’at oliygohlarini bitirgan pedagoglarning oldida ikkita yo‘l turadi: xalq ta’limi tizimidagi maktabda musiqadan dars berish va musiqa maktablarida ishlash. Lekin ularning oyliklarini solishtirsangiz, katta farq bor.
Mas’ul yuqori tashkilotlar musiqa maktablarini maktab o‘rnida ko‘rishmayapti va ularni xuddi to‘garakdek qabul qilishmoqda. Shuning uchun musiqa maktablarida oylik juda past. Musiqa bo‘yicha mutaxassis tayyorlamaydigan xalq ta’limi tizimidagi maktablarda esa oylik yuqori. Shu sababdan oliy ma’lumotli kadrlar maktablarga ketib qolishyapti. Musiqa maktablarini kuni o‘rta maxsus ma’lumotli kadrlarga qolib ketmoqda.
Hozir oldimizda turgan asosiy masala ham shu: musiqa maktablari o‘qituvchilari va xalq ta’limi tizimidagi maktablar o‘qituvchilarining oyliklarini muvofiqlashtirish. Faqat shundagina kadrlar yetishmovchiligi muammosini hal qilish mumkin. Boshqacha yo‘l bilan kadrlarni musiqa maktablarida ushlab qolib bo‘lmaydi”, — dedi Nazarbekov.
Mavzuga doir:
- Ozodbek Nazarbekov “Mendirman Jaloliddin”ga bildirilgan tanqidlar va filmning navbatdagi mavsumi qachon suratga olinishiga izoh berdi
- Ozodbek Nazarbekov aktyor Alisher Uzoqovning Prezidentga qilgan murojaatidagi masala bo‘yicha munosabat bildirdi
- “Amir Temurning o‘zi qirib yuborardi”. Ozodbek Nazarbekov din sabab san’atni tark etayotgan hamkasblarining musiqani harom deyayotganiga munosabat bildirdi
Izoh (0)