Маданият вазири Озодбек Назарбеков 24 май, душанба куни «Тошкент 5 ташаббус ҳаракати» ёшлар фестивали доирасида ОАВ вакилларига берган интервьюсида охирги пайтларда айрим санъаткорларнинг дин сабаб соҳани тарк этиб, санъатни ҳаром деб атаётганига нисбатан ўз муносабатини билдирди. Бу ҳақда «Дарё» мухбири Миролим Исажонов хабар бермоқда.
«Динни яхши билмасдан ва яхши тушунмасдан, жамоат ва халқ олдига чиқиб, минбардан туриб диндан гапириш учун, менинг назаримда, энг камида 25 йиллик билим олган бўлиш керак.
Етарли даражада билим олиб, ундан кейин дин номидан гапириш сал ярашади. Лекин ўзи куни кеча умуман бошқа ҳаёт тарзини бошидан кечириб турган одам бир кунда саҳнага чиқиб, диндан гапириши ғалатироқ, назаримда. Албатта, ҳар бир инсоннинг эътиқодига аралашишга ҳеч кимнинг ҳақи йўқ. Нима бўлган тақдирда ҳам ўзи эътиқод қилаётган тушунчани ҳаммага қабул қилдиришга уриниш ҳам сал нотўғрироқ нарса», — деди Назарбеков.
Унинг қайд этишича, агар мусиқа ёки санъат ислом динида ҳаром бўлганида бу пайтгача етиб келмас эди, Амир Темурнинг ўзи қириб юборарди.
«Энди бу санъатимизни ҳаром дейиш учун, буни тўғри ёки нотўғри гап эканлигини ажратиб олиш учун жуда катта ақл шарт эмас. Сабаби агар шу даражада мусиқа ёки санъат динимизда ҳаром бўлганида бугунгача етиб келмас эди. Амир Темурнинг ўзи қириб юборарди. Бизда диний билим уфурган бир даврда санъат қолмаган бўларди, Ўзбекистоннинг санъати йўқ бўлиб кетган бўларди. Мусиқа санъати бизгача етиб келмас эди.
Чунки биз яхши биламиз динни дунёга ўргатган давримиз бўлган, нафақат бу, балки бошқа йўналишларда ҳам. Диндан, керак бўлса, арабларга ўргатган давримиз бўлган. Наҳот ўша пайтларда яшаган санъат, мусиқа бугун 4 нафар одамни деб ҳаромга чиқиб қолса. Бу ўша қайсидир маънода динни яхши тушунмаслик, ҳовлиқмаликдан деб биламан. Эътиқод, иймонда инсон бир гавҳар топгандек ўзини тутолмай қолади. Ўша пайтда сал устозлар билан маслаҳатлашиб, иш кўрилса тўғри бўлади, менимча», деди — маданият вазири.
Сўнгги йилларда бир неча шоу-бизнес вакиллари санъатни тарк этиш ҳолати кузатилмоқда. Жумладан, актёрлар Фарруҳ Соипов ва Шерзод Бин, хонанда Сардор Раҳимхон ҳам санъатни тарк этганини маълум қилган.
Изоҳ (0)