Шерзод Кудбиев Олмалиқдаги воқеалар сабаб нега 11 нафар солиқчини ишдан олганига изоҳ берди

Давлат солиқ қўмитаси раиси Шерзод Кудбиев 24 май, душанба куни «Тошкент 5 ташаббус ҳаракати» фестивали доирасидаги ёшлар билан учрашувда Олмалиқ шаҳрида кўчада савдо қилган аёлларга куч ишлатгани ортидан ишдан олинган солиқчилар масаласига тўхталди. Бу ҳақда «Дарё» мухбири хабар бермоқда.

«Олмалиқдаги юз берган воқеа тўғри ҳолатмиди? Мутлақо нотўғри ҳолат бўлган. Ўша воқеа сабаб 11 нафар солиқ ходими ишдан кетди. Чунки уларнинг чора кўриш услуби нотўғри эди. Лекин улар, биринчидан, топшириқни бажаришган. Иккинчидан, ўшандек ёйма ҳолатида савдо қилиш барча талабларга зид. Мен нимага уларни ишдан олиб ташладим? Чунки уларнинг аёллар билан бундай муомалада бўлиши мумкин эмас. Бошқа томондан солиқчи куч ишлатишга ҳақи йўқ. Солиқ органи фақат маъмурий чора кўриши мумкин, холос.

Мен туман ҳокими сифатида ҳам ишлаганман. Сиз муддати ўтган, андиша қилинадиган нарсалар сотилишини муаммо деяпсиз, лекин ундан каттароқ муаммолар бор. Бу чек бермаслик, пластикка савдо қилишда 15-20 фоизга нарх қиммат бўлади, деб айтиши ёки пластикдан олишга рози бўлганда терминалдан ечмасдан, пластик карточкага тўлов тизимлари орқали ўтказиб беришни сўрашади. Иккита жисмоний шахс ўртасидаги ўтказма савдо бўлмайди-да, солиғини тўламайди. Мана шулар аслида катта муаммо. Шунга қарши курашишмиз керак», — деди ДСҚ раиси.

Маълумот учун, Давлат солиқ қўмитаси раиси Шерзод Кудбиев Олмалиқда сотувчиларнинг буюмларини тортиб олган солиқ хизматчилари акс этган видео юзасидан мурожаат қилиб, халқдан бу воқеа учун узр сўраганди.