«Тошкент беш ташаббус ҳаракати» доирасида Ёшлар билан очиқ мулоқотда қатнашган бош вазир ўринбосари Беҳзод Мусаев Президент Шавкат Мирзиёев ташаббуси билан ташкил этилаётган янги университет ҳақида гапирди. Бу ҳақда «Дарё» мухбири хабар бермоқда.
«2021 йил 1 сентябрдан бошлаб республиканинг барча ҳудудларида Президент мактаблари ўз фаолиятини бошлайди. Бу ерда Кембриж таълим тизими асосида дарс берилади. Президентимиз Шавкат Мирзиёев шу ерга келганда масаланинг иккинчи томонини ҳам ўйладилар ва саволни ўртага ташладилар: Кембриж таълим тизими бўйича ўқишни битирган болалар қаерда ўқийди? Шу мақсадда Ўзбекистонда Янги Ўзбекистон университетини ташкил қилиш бўйича дастлабки қадамлар ташланди», — дея гапириб ўтди Мусаев.
Эслатиб ўтамиз, 2020 йил охирида Ўзбекистон Президенти Шавкат Мирзиёев ёшлар форумида иштирок этиб, сўзлаган нутқида ёшлар замонавий илм-фан ва юқори технологияларни мукаммал эгаллаши зарурлиги, бунинг учун барча куч ва имкониятлар ишга солинишини айтган ҳамда «Шу мақсадда таълим тизимида туб ислоҳотларни амалга оширяпмиз. Соҳада мутлақо янги тизим – Президент ва ижод мактаблари, математика, кимё, биология фанлари бўйича махсус мактабларни ташкил этяпмиз. Ёшларимизга IТ технологияларни чуқур ўргатадиган таълим масканларининг сони тобора кўпайиб бормоқда. Бу ишларимизнинг илк меваларини кўра бошладик. Сўнгги уч йилда мамлакатимиз ёшлари нуфузли халқаро танлов ва мусобақаларда беш ярим мингтага яқин совринли ўринларни қўлга киритди», — дея таъкидлаган эди.
Аввалроқ Таълим сифатини назорат қилиш давлат инспекцияси «Тошкент материалшунослик университетини ташкил этиш тўғрисида»ги Вазирлар Маҳкамаси қарори лойиҳасини муҳокамага қўйган, олий таълим соҳасида соғлом рақобат муҳитини шакллантириш, олий таълим билан қамраб олиш даражасини ошириш мақсадида Ўзбекистоннинг ҳар бир ҳудудида 2021 йил 1 сентябргача камида биттадан нодавлат ОТМ очилиши маълум қилинган.
Тошкентда Япония рақамли университети ташкил этилиши, пойтахтда Санкт-Петербург давлат университети филиали очилиши ҳақида хабар берилган эди.
Изоҳ (0)