Тошкентнинг Яшнобод туманида рашк сабаб шаръий никоҳдаги хотинини ўқлов билан уриб ўлдирган эркак 8 йилга қамалди. Бу ҳақда «Darakchi.uz» хабар берди.
Маълум қилинишича, Даврон Бобоев (исм-шарифлар ўзгартирилган) шаръий никоҳдаги турмуш ўртоғи Гулбаҳор Хуррамованинг уйида биргаликда спиртли ичимлик истеъмол қилган. Маст ҳолда келиб чиққан келишмовчилик оқибатида жанжаллашиб, аёлни ўқлов билан калтаклаган. Аёл етказилган оғир тан жароҳати туфайли воқеа жойида ҳалок бўлган. Таъкидланишича, эр бундан аввал ҳам Жиноят кодексининг бир қанча моддаларига асосан судланиб, жазога тортилган бўлган.
Судда Даврон Бобоев айбига иқрор бўлган ва жиноятга хотинининг бегона эркак билан телефонда гаплашгани сабаб бўлганини баён этган. Унинг сўзларига кўра, эрталаб хотини билан бирга спиртли ичимлик истеъмол қилган. Кейин рўзғорга керакли нарсаларни олиб келиш учун бозорга кетган.
«Келганимда Гулбаҳор меҳмонхонадаги диванда ўтирганча телефонда нотаниш эркак билан гаплашаётган экан. У менинг қайтганимни кўрмай, бегона эркакка ‘Эрим уйда йўқ, бозорга кетган’, деди. Бу гапни эшитиб, жаҳлим чиқди. Унинг олдига бориб, телефонини беришни сўрадим. У рад жавобини бергач, телефонни тортиб олдим. Гулбаҳор гаплашган одамга қайтиб қўнғироқ қилгандим, гўшакни кўтармади. Бундан жаҳлим чиқиб, телефонни диванга ирғитдим. Кейин Гулбаҳорнинг юзига шапалоқ тортдим. Урганимга хотинимнинг жаҳли чиқиб, куракда турмайдиган сўзлар билан ҳақоратлади», — деган у.
Хотини ўзига келгач, ошхонадан ўқловни кўтариб, келин уни урмоқчи бўлганда чап бериб, қўлидан ўқловни тортиб олган ва шу ўқлов билан уни калтаклаган.
Даврон Бобоев Жиноят кодексининг 104-моддаси 3-қисмининг «б, д» бандларида (такроран, хавфли рецидивист ёки илгари қасддан одам ўлдирган шахс томонидан қасддан баданга оғир шикаст етказиш жабрланувчининг ўлишига сабаб бўлиши) назарда тутилган жиноятни содир этганликда айбдор деб топилган ва унга 8 йил муддатга озодликдан маҳрум қилиш жазоси тайинланди. Тайинланган жазо қаттиқ тартибли колонияларда ўташи белгиланган.
Изоҳ (0)