Дунё бўйлаб коронавирус билан касалланиш даражасида кўтарилиш ёки пасайиш кузатилмоқда, лекин биз тўлқинлар ҳақида гапирмаслигимиз, балки вируснинг кенг тарқалишини тўхтатиш учун касаллик ортган пайтда уни диққат билан кузатишимиз керак, деб таъкидлади Жаҳон соғлиқни сақлаш ташкилоти (ЖССТ)нинг Россиядаги вакили Мелита Вуйнович «Говорит Москва» радиосига берган интервьюсида.
Вуйновичнинг сўзларига кўра, ЖССТ мутахассислари «тўлқин» атамасини ишлатмайди, чунки бу 1918 йилги испан гриппи пандемиясига ўхшатиш бўлиб, ўшанда учинчи тўлқин деярли тугаганида иммунитет етарлича ҳосил бўлган эди, шундан кейин ҳаммаси тугаган.
«Биз ҳозир нафақат Европа, балки бутун дунёда коронавирус билан касалланиш даражасининг ортаётгани ва пасаяётганини кузатяпмиз. Албатта, мен ‘Роспотребнадзор’нинг тўлқин ҳақида гапирмай, вируснинг кўпайиш вақтини диққат билан кузатиш кераклиги тўғрисидаги фикрига қўшилишга тайёрман», — деб таъкидлади ЖССТ вакили.
Унинг сўзларига кўра, коронавирус пандемияси бирор жойдан тўлқин келиши оқибатида пайдо бўладиган «тошқин эмас». «Вирус шу ерда, биз билан. У одамларнинг хатти-ҳаракатларига боғлиқ», — деб қўшимча қилди Вуйнович.
Аввалроқ Россия соғлиқни сақлаш вазири Михаил Мурашко учинчи тўлқин хавфини бемаънилик деб атаган эди. Вазир учинчи тўлқинни кутиш шарт эмаслигини, тезроқ вирусга қарши эмланиш кераклигини айтган.
Март ойида Европа Комиссиясининг расмий вакили Дана Спинант минтақада коронавирус пандемиясининг учинчи тўлқини бошланганини маълум қилган эди. Спинант учинчи тўлқин Европанинг турли давлатларида босқичма-босқич, ҳаттоки, тез суратларда тарқалишини таъкидлаб, унинг Евроиттифоқ иқтисодиётига салбий таъсир кўрсатишидан огоҳлантирган.
Аввалроқ Михаил Мурашко COVID-19’га нисбатан жамоавий иммунитет сентябрга келиб шаклланишини маълум қилди. Мурашконинг сўзларига кўра, коронавирусга қарши эмлаш режа бўйича бормоқда. Шу билан бирга, у 9 май ҳолати бўйича Россия бўйлаб неча киши эмлангани ҳақида маълумот келтириб ўтмади.
Изоҳ (0)